Tababaraha xulka qaranka Morocco ee Walid Regragui ayaa ka hadlay saaxiibtinimada u dhaxaysa xiddigaha Paris Saint-Germain ee Kylian Mbappe iyo Achraf Hakimi oo ka mid ah ciyaartoyda iskugu dhow ee sannadihii ugu dambeeyey lagu arkay garoomada.
Labadan ciyaartoy ayaa iska hor yimid semi-finalkii Koobka Adduunka iyaga oo kala hoggaaminaya xulalkooda Morocco iyo Faransiiska, waxaanay libintu 2-0 ku raacday Faransiiska iyadoo Morocco ay taariikhda gashay oo ay noqotay waddankii ugu horreeyey ee Afrikaan iyo Carab ah ee soo gaadha nus-dhamaadka Koobka Adduunka.
Ciyaartii Atlas Lions iyo Les Bleus ayaa markii ay dhamaatay ciyaartoodii semi-finalka Koobka Adduunka, waxa garoonka dhaxdiisa iskugu yimid Mbappe iyo Hakimi oo garamaha kala beddeshay, ciyaarrta ka horna waxay isku direen farriimo ay iskugu hambalyeynayaan markii ay dalalkoodu soo gaadheen wareegga afar-dhamaadka.
Walid Regragui oo ah tababaraha xulka Morocco ayaa wax laga weydiiyey xidhiidhka ka dhexeeya Kylian Mbappe iyo Achraf Hakimi, waxaanu ku jawaabay: “Xidhiidhkoodu wuu ka weyn yahay saaxiibtinimo. Waa walaalo. Waxa aan ku idhi Achraf intii uu socday Koobka Adduunku: ‘waxa aad la ciyaaraysaa saaxiibkaa’. Waxa uu iigu jawaabay, ‘Ciyaarta dhaxdeeda ma jirayso saaxiibtinimo.’ Waxa uu ahaa tartame wanaagsan ciyaartaas.”
Achraf Hakimi ayaa PSG ku biiray sannadkii 2021 oo ay kooxda reer France kasoo iibsatay Inter Milan, halkaas ayaanayksoo bilaabantay saaxiibtinimada Mbappe iyo Hakimi. Illaa hadda waxa uu Hakimi u saftay PSG 64 kulan oo dhamaan tartamada ah oo uu u dhaliyey toddoba gool iyo sagaal kale oo uu caawiye ka noqday.
Mbappe ayaa isaguna PSG waxa uu sannadkii 2017 kaga soo biiray AS Monaco, waxaana 239 ciyaarood oo uu u dheelay uu u dhaliyey 191 gool iyo 93 kale oo uu caawiye uga noqday.
