Xiddiga Brazil ee Neymar ayaa farriin qiiro leh ku sagootiyey tababare Tite oo iska casilay shaqada xulka qaranka Brazil kaddib markii uu dalkaasii wareegga siddeedda kaga hadhay Koobka Adduunka.
Brazil ayaa waxa rikoodheyaal 4-2 ah ku garaacday Croatia oo iyagana xalay ay tartanka ka saartay Argentina, waxaanay taasi keentay in tababare Tite uu si degdeg ah u shaaciyo inuu iska casilay xulka Brazil ee uu soo maamulayay tan iyo June 2016. Muddadii uu tababaraha u ahaa, Brazil ayaa ciyaartay 81 kulan oo ay guuleysteen 61 ka mid ah, 13 kalena ay barbarro galeen. Waxa uu sidoo kale u qaaday Copa America 2016.
Neymar oo 54 ciyaarood u saftay xulkiisa Brazil intii uu Tite tababaraha u ahaa, isla maarkaana dhaliyey 31 gool iyo 30 kale oo uu caawiye ka noqday ayaa qoraal uu ku daabacay bartiisa bulshada ee Instagram waxauu ku macasalaameeyey Tite, isaga oo yidhi: “Ka hor intii aynaan si shaqsi ah u kulmin, waxaynu iska hor nimid marar badan [Tite oo tababare u ah koox kale ayuu Neymar ka hor tegay], waad iga cadhaysiin jirtay sababtoo ah waxa aad kooxdaada ka dhigi jirtay mid aniga i ilaalisa, wax walbana waad u samayn jirtay si aad ii garaacdaan.
“Waan ogaa in aad tahay tababare aad u wanaagsan, laakiin waxa aan hadda ogahay in aad sidoo kale tahay shaqsi fiican. Waad garanaysaa qofka aan ahay, taas ayaana macne weyn ii ah.
“Waad ku mahadsan tahay wax kasta oo aad qabatay, iyo wax kasta oo aad na bartay. Waxa aad mar walba ka mid ahaan doontaa tababareyaashii ugu wanaagsanaa ee aan abid arko.”
