Tababaraha kooxda Arsenal ayaa dareenkiisa cadho soo bandhigay kaddib barbardhacii goolal la’aanta ahaa ee ay kooxdiisu xalay la gashay Newcastle United oo Emirates Stadium marti ugu ahayd.
Arsenal ayaa markii ugu horreysay xilli ciyaareedka ku fashilantay inay wax gool ah dhaliso iyadoo haatan siddeed dhibcood hoggaanka kaga haysa Man City oo kulankeedii toddobaadka habeen dambe ciyaaraysa.
Arsenal ayaa laba rigoore ku dooday inay xaq u lahaydd kulanka dhexdiis, midka koowaad ayaa ahaa in Dan Burn xerada ganaaxa dhexdeeda ku jiitay Gabriel Magalhaes halka midka labaad ahaa kubad uu Xhaka laagay oo gacanta ka taabatay Murphy.
Labadaas dhacdo ee ay Gunners rigoorayaasha ku doonayeen ayuu labadaba diiday garsoore Andy Madley oo kulanka dhex-dhexaadinayay.
“Waxa jiray laba fadeexadood oo rigoorayaal ah. Ama waa rigoore ama maaha labadaniba waxay ahaayeen rigoorayaal” ayuu kulanka kaddib yidhi Mikel.
Arteta ayaa diiday inuu warbaahinta horteeda kaga hadlo garsoore Madley isaga oo yidhi “Halkan uma joogo inaan garsoorayaasha kaga hadlo, waan ka xumahay”.
Tababaraha Newcastle ee Eddie Howe ayaa sheegay inuu isaguba rigoore codsan lahaa haddii kubaddu ku dhacdo ciyaartoy Arsenal ah balse uu garsooruhu saxsanaa.
