Marnaba niyaddiisa kuma jirin inuu tegayo waddanka Qatar oo uu xulka qarankiisa ee ka qayb-gelaya Koobka Adduunka uu ka mid noqonayo, hase yeeshee si lama filaan ah ayuu uga war helay iyadoo la raadinayo si loogu sheego in ciyaartoy dhaawacmay booskiisa lagu beddelayo.
Xulka qaranka Argentina ayaa waxa ka dhaawacmay Joaquim Correa iyo Nico Gonzalez oo kusoo baxay liiskii hore ee rasmiga ahaa ee tababare Lionel Scaloni soo saaray, waxaana qasab noqotay in labadoodaba laga saaro iyadoo Thiago Almada loogu yeedhay inuu galo booska Angel Correa.
Thiago Almada ayaa waqtigii uu nasiibkiisu soo baxay ee Koobka Adduunka loogu yeedhayay waxa uu ku jiray xaalad aan marnaba niyaddiisu la xidhiidhin ciyaaraha, waxaanu ku sugnaa dhakhtar ilkaha ah, balse waxa uu helay telefoon loogu sheegayo in lagu daray xulka dalkiisa Argentina.
Saxaafadda ayaa Thiago Almada weydiisay halkii uu ku sugnaa waqtigii uu ogaaday in lagu daray xulka dalkiisa, waxaanu ku jawaabay: “Waxa aan ku sugnaa dhakhtar ilkaha ah markii ay soo waceen ee ay igu yidhaahdeen, ‘waxa aad tegaysaa Koobka Adduunka’. Waxay ahayd farxad degdeg ah, diyaar ayaanan u ahay in ku kordhiyo xulkayga wax kasta oo karaankayga ah.”
Angel Correa oo u ciyaara Atletico Madrid kana mid ahaa xiddigihii xulka Argentina ee ku guuleystay Copa America sannadkii hore ee 2021, ayuu Scaloni ka saaray liiska markii ay dhakhaatiirtu caddeeyeen in aanu taam noqonayn, waxaana fursaddaas ka faa’iidaystay Thiago Almada.
Si kastaba ha ahaatee, xulka qaranka Argentina ayaa ku ducaysanaya in Cristian Romero iyo Papu Gomez ay taam noqdaan kaddib markii ay ka maqnaadeen Jimcihii iyadoo sidoo kalena uu liiska maqaneyaasha kula jiray Lionel Messi.
