Sidee Ayaa Liverpool Lagu Siin Karayaa Saddexda Dhibcood Ee Kulankii Manchester United Ee Baaqday?

Kaddib markii ay baaqatay ciyaartii Manchester United iyo Liverpool ee Axaddii oo ay joojiyeen taageereyaasha Red Devils oo u cadhaysan mulkiileyaasha kooxooda, waxay dhiggooda Liverpool fiirsanayaan buugaagta sharciga, iyagoo ka baadhaya sida kooxdoodu ay ku heli karto siddexdii dhibcood ee ciyaartaas.

Premier League ayaa war-saxaafadeed uu soo saaray xalay, waxa uu ku sheegay in go’aan wada-jir oo labada kooxood, ciidamada booliska iyo maamulka dawladda ah, ay iskula qaateen in ciyaarta la baajiyo maadaama ay xasillooni darro dhacday, lagana fikiray nafaha taageereyaasha iyo badqabka ciyaartoyda.

Ciyaarta oo markii hore dib loo dhigay muddo saacad ah iyadoo rajo laga qabay in boolisku ku guuleysan doono in ay kala kexeeyaan taageereyaasha, ayaa kusoo dhamaatay rajo la’aan kaddib markii ay mudaharaadeyaashu iska caabbiyeen, dagaalna kala hor tageen booliska.

Liverpool oo guul ay ka hesho kulankaasi uu muhiim ugu ahaa in ay kusii raad-joogto Chelsea iyo Leicester City oo dhibco badan ka horreeya, laakiin ay rajo ka qabto in ay gaadho si ay kaalinta afraad usoo geli karto, ayaa waxay dhimasho ka xigtaa in saddexda dhibcood ay weydo.

SIda uu dhigay buugga sharci ee FA, farqaddiisa 8.3.4. Manchester United ayaa lagu qaadi doonaa dembiga ah in ay iyadu lahayd qaladka in ciyaartaasi dhici weydo, taas oo ay ka dhalan karto tallaabo farxad gelin karta Liverpool.

Arrinta kulankan ayaa lagu samayn doonaa baadhitaan, haddii ay caddaato in United ay tallaabooyinkii ku habboonaa ka qaadi weyday in taageereyaasha laga baajiyo in ay rabshadda sameeyaan, sidoo kalena loo nisbeeyo in ay qayb ka ahayd in ciyartaasi baaqato, qodobkan ayaa sheegaya in Liverpool la siin doono saddexda dhibcood ee kulankaas iyadoo aan la ciyaari doonin kulankan.

Laakiin arrinta Red Devils badbaadin karta ayaa ah in boolisku ay gaadheen go’aanka ah in ciyaarta la joojiyo, taas oo sida uu sharciga Premier League dhigayo ka dhignaan doona in Manchester United aan lagula xisaabtami doonin, sababteedana aan loo nisbayn doonin in kulankaasi uu baaqdo.

Wargeyska Liverpool Echo ee kasoo baxa magaalada Liverpool ayaa dhinacyo badan ka eegay arrintan, waxaana uu isbarbar-dhig ku sameeyey qodobbada sharci ee loo adeegsado kulamada baaqda ee qasku hadheeyo iyo sida koox loo siin karo saddexda dhibcood iyadoo aan ciyaarin.

Gunaanadkii ayuu wargeysku soo dhigay laba qodob oo midkood ku yaallo buugga sharci ee xidhiidhka kubadda cagta FA iyo midka labaad oo ku yaalla buugga Premier League.

Midka hore ayaa tibaaxaya in ay tahay in baadhitaan lagu sameeyo kiiska oo United haddii ay sababta baajisay kulanka ay yeelato, in saddexda dhibcood ay waayi doonto, si toos ahna loogu wareejin doono Liverpool, halka uu kan kale ee Premier League uu eegayo cidda gaadhay go’aanka baajinta ciyaarta, taas oo ka timid booliska.

App-ka cusub ee laacib.net waxaad ka degsan kartaa google play store haatan, wararka degdeg ah waxay kuugu soo dhacayaan mobile-kaaga RIIX HALKAAN SI AAD U DEGSATO

Noqo Qofka Ugu Horeeya Ee Comment Soo Qora

Aragti Ka Dhiibo Warbixintaan

Email-kaaga Lama Soo Bandhigi Doono.


*