Hordhac: Man City vs PSG – Rikoodhadoodii Hore, Shaqada Adag Ee U Taalla Poch, Shaxaha Macquulka Ah Iyo Xaalka Mbappe

Manchester City ayaa garoonkeeda Etihad Stadium ku qaabbilaysa PSG lugta labaad ee semi-finalka Champions League, iyadoo isha kusii haysa magaalada Istanbul oo ay ka dhacayso ciyaarta finalka.

Kooxda reer England ayaa ciyaartii hore kusoo badisay 2-1 iyadoo joogta Paris, waxaana gool uu waqti hore PSG u dhaliyey Marquinhos ka daba yimid Kevin de Bruyne iyo Riyad Mahrez oo kooxdooda guusha ku hoggaamiyey.

Labada kooxoodba waxay kulankan yimaaddeen iyagoo guulo kasoo hooyey kulamadii maxalliga ahaa ee horyaalladooda ee Sabtidii. City ayaa 2-0 kusoo muquunisay Crystal Palace, halka ay PSG 2-1 kaga badisay Lens, isla markaana soo noolaysay rajada ay ka qabaan in horyaalka Ligue 1 ay difaacan karaan.

Tababare Pep Guardiola ayay kooxdiisu dhibaato dhadhaqamisay qaybta hore ee ciytaartii Parc des Princes, markaas oo PSG ay gool dhalisay, fursado kalena iska khasaariyeen, laakiin qaybtii dambe ayay City awood layaable lasoo baxday iyagoo kubadda ka dhaariyey Neymar iyo Mbappe oo ay kooxda reer France wax ka sugaysay, taas oo ay waliba ugu sii dareen laba gool oo shan daqiiqadood gudahood ay dhaliyeen De Bruyne iyo Mahrez iyo waliba kaadh cas oo uu ku baxay Gueye.

Xaqiiqada ah in ay kooxiba qayb maamulaysay ciyaarta ayaa halkeeda taalla, laakiin sida ay fursadahooda uga faa’iidaysteen ayay is-dheeraayeen, waxaana gacanta sare yeelatay City oo caawana garoonkeeda loogu imanayo.

Kubbad-sameeyaha reer Belgium ee Kevin de Bruyne ayaa goolka uu kooxdiisa ugu aftaxay uu ahaa nasiib, waxaanay kubaddu goolka gashay iyadoo uu Keylor Navas xisaab qaldan isku-geystay, una qaatay in kubaddu aanay goolka ku socon ee ay ciyaartoyda kale u tegay, taas oo keentay in kubaddu dhulka ku dhacdo, iskana gasho goolka. Goolka labaad ayuu Mahrez kubadda ka dhex-saaray Leandro Paredes iyo Presnel Kimpembe oo laad xor ah isku-dhigayay/

PSG ayaa wax jawaab ah qaybta dambe ka weyday Neymar iyo Mbappe oo sidii laacibiin soo daawasho tegay garoonka u dhex-taagnaa, laakiin qaybta hore ayuu xiddiga reer Brazil ee Neymar aad u cad-caddaa.

Kaddib saddex sannadood oo isku xiga oo wareegga siddeedda ay ku hadheen, Pep Guardiola ayaa sannadkan ay ka go’an tahay in kooxdiisu ay tagto Ataturk Olympic Stadium oo 29 May lagu qabanayo finalka, halkaas oo ah garoonkii mucjisada ee Liverpool ay sannadkii 2005 ku qaadday koobka.

Ciyaartii ugu dambaysay ee horyaalka ee Sabtidii ayuu Guardiola nasistay siddeed ka mid ah xiddigihii uu PSG kula ciyaaray kulankii hore, waxaase labada gool ee ay libinta kaga heleen Palace u kala dhaliyey Sergio Aguero iyo Ferran Torres oo muujiyey in City ay tahay laba kooxood oo mid walba gaarkeeda u tartami karaysa.

Sannadkan socda ee 2021, goolkii madaxa ahaa ee Marquinhos uu ka dhaliyey ayaa Pep Guardiola kooxdiisa u ahaa midkii afraad ee Champions League ah ee laga dhaliyey afarta bilood iyo dheeraadka sannadkan laga galay, waxaanay taasi muujinaysaa in ay u qalmaan in ay halkan iyo meel kasii dambaysaba gaadhaan.

Haddii ay caawa guuleysto Man City, waxay dhigi doontaa rikoodh taariikhi ah iyagoo soo qaban doona rikoodhkii Carlo Ancelotti ee toddoba ciyaarood oo isku xiga oo Champions League ah oo ay wada guuleystaan, iyadoo dhinaca Ingiriiskana ka noqon doonta kooxdii ugu horreysay ee sidaas samaysa.

Dhinaca kale, Pochettino ayaa ogsoon in kooxdiisu ay u baahan tahay guul iyo goolal ugu yaraan laba ah, iyo in ay shabaqeeda ilaashato si ay ugu gudubto finalka oo sannadkii horena uu ku hoggaamiyey Thomas Tuchel.

Garoonka Etihad Stadium ee ay caawa tegayso PSG, waxa hore ugu soo garaacay Manchester City kooxaha Leeds United, Leicester City iyo Manchester United, waxaana ay isku dari karaan liiskan dhifta ah ee sannadkan la arkay.

PSG oo tartanka Champions League ee xilli ciyaareedkan ku bilaabatay niyad-jab iyo guul-darrooyin, waxa kulankii ugu horreeyeyba ka naxsatay Manchester United oo ku karbaashtay Parc des  Princes, waxaana guul-darro kale oo 2-1 ah ugu dartay Borussia Dortmund. Iyadoo xaalkoodu sidaa yahay ayay u safreen magaalada Manchester, halkaas oo haddii lagaga soo badin lahaa ay ka hadhi lahaayeen tartankan socda ee ay semi-finalka joogaan, laakiin waxay kasoo heleen guul weyn iyagoo ku damaashaaday Old Trafford.

Halkaas ayay PSG kasoo bilowday dagaalka, waxaanay guulo gaadheen saddexdii ciyaarood ee ku xigay.

Mauricio Pochettino ayay horyaallaan saddex kulan oo adag oo ay tahay in uu ku badbaadiyo xilli ciyaareedka kooxda, waxaanay midda hore tahay, in caawa ay Man City kasoo adkaadaan, kaddibna ay isku diyaariyaan ciyaarta adag ee Montpellier HSC ay la ciyaari doonaan semi-finalka Coupe de France May 12. Horyaalka Ligue 1 oo sidoo kale ay kaalinta labaad kaga jiraan, ayay tahay in ay guulo ka keenaan si ay uga sare maraan Lille oo guul ay ka gaadhay Nice hoggaanka ugu soo laabatay.

Arrinta ay niyadda wanaagsan kusii dhisanayaan ciyaartoy PSG ka hor kulanka City ayaa waxa uu yahay, in lix ka mid ah toddobadii ciyaarood ee Champions League ee ay martida noqdeen xilli ciyaareedkan ay guulo soo heleen, sida Barcelona oo ay ku karbaasheen Camp Nou iyo Bayern Munich oo ay 3-1 kaga soo badiyeen iyagoo jooga Allianz Arena.

Kulamadii hore ee Man City & PSG

Kulanka caawa ayaa noqonaya markii shanaad ee ay Manchester City iyo PSG ku kulmaan dhamaan tartamada, waxaana kooxda reer France ay ku guul-darraysatay in dhamaan kulamadaas ay guul ka hesho City.

Garoonka Etihad Stadium ayay hal mar oo kaliya ku ciyaareen, waxaanu ahaa wareeggii siddeedda ee tartanka Champions League ee xilli ciyaareedkii 2015-16 oo ay ku kala baxeen 2-2, waxaana semi-finalka u gudubtay Man City oo goolka barbarraha oo uu u keenay Kevin de Bruyne uu ka caawiyey in celceliska labada lugood ay ku gudubto.

Kaddib markii uu gool kusoo dhaliyey Parc des Princes usbuucii hore, Kevin de Bruyne ayaa noqon kara ciyaartoygii labaad ee abid afar kulan oo isku xiga oo Champions League ah goolal ka dhaliya PSG, waxaana ka horreeyey Neymar waqtigii uu Barcelona joogay, laakiin De Bruyne ayay tahay in uu caawa gool dhaliyo.

Xogta kulanka

Ciyaarta: Manchester City vs Paris Saint-Germain

Tartanka: Lugta labaad ee semi-finalka Champions League

Waqtiga: 10pm – Saacadda Geeska Afrika

Garoonka: Etihad Stadium

Wararkii u dambeeyey labada kooxood

Pep Guardiola ayaa xaqiijiyey in dhamaan ciyaartoydiisu ay u badqabaan marka laga reebo Eric Garcia oo xanuunsanaya, waxaana sidoo kale kusoo laabanaya safka kooxda John Stones oo ganaax kaga maqan horyaalka.

Ruben Dias ayaa la nasiyey kulankii Selhurst Park, waxaana ay isku soo garab bilaaban doonaan Stones, halka Benjamin Mendy Joao Cancelo oo Sabtidii ciyaaray ay u badan tahay in uu kaydka ku jiro oo Oleksandr Zinchenko iyo Kyle Walker ay labada baalood ee difaaca ka ciyaaraan.

Ilkay Gundogan iyo Bernardo Silva ayaa iyaguna soo nastay, waxaana la mid ah Kevin de Bruiyne iyo Riyad Mahrez oo dhamaantood u diyaarsan kulankan.

Dhinaca PSG, waxa ciyaartii Sabtidii ee Lens ka maqnaa Kylian Mbappe oo dhaawac qaba, laakiin Pochettino ayaa sheegay in ay rajaynayaan in uu soo kaban doono oo uu ciyaarayo.

Idrissa Gueye oo kaadh qas qaatay lugtii hore ayaa waxa beddeli doona Ander Herrera, sida la saadaalinayo, halka Colin Dagba isagana la filayo in uu kasoo kabto dhaawac oo uu beddelo Alessandro Florenzi iyo Abdou Diallo oo isaguna taam ah, kuna soo bilaaban doona kaydka haddii Mitchel Bakker uu safka hore noqdo.

Angel di Maria iyo Marco Verratti ayaa laduba ahaa beddel aan la isticmaalin kulankii Sabtidii, waxaanay hoggaamin doonaan shaxda caawa, halka Icardi uu isaguna kusoo bilaaban doono haddii Mbappe uu dhaawac ahaado.

Shaxaha macquulka ah ee labada kooxood

Manchester City: Ederson; Walker, Dias, Stones, Zinchenko; Rodri, Gundogan, Silva; Mahrez, De Bruyne, Foden

Paris Saint-Germain: Navas; Florenzi, Marquinhos, Kimpembe, Bakker; Paredes, Herrera; Di Maria, Verratti, Neymar; Mbappe

App-ka cusub ee laacib.net waxaad ka degsan kartaa google play store haatan, wararka degdeg ah waxay kuugu soo dhacayaan mobile-kaaga RIIX HALKAAN SI AAD U DEGSATO

Noqo Qofka Ugu Horeeya Ee Comment Soo Qora

Aragti Ka Dhiibo Warbixintaan

Email-kaaga Lama Soo Bandhigi Doono.


*