Tababaraha xulka Portugal ee Fernando Santos ayaa sheegay sababta uu kursiga keydka ugu dhaadhiciyay weeraryahankiisa Cristiano Ronaldo kulankii Switerland ee xalay.
Portugal ayaa 6-1 kaga adkaaday dhigooda Switzerland kulan uu intii badan keydka fadhiyay kabtan Ronaldo iyadoo waliba hadal hayn weyn ay yeelatay in xiddigii lagu bedelay ee Goncalo Ramos saddexley goolal ah uu dhaliyay.
Haddaba, kulanka kaddib tababare Santos oo saxaafada la hadlay ayaa sheegay inuu xidhiidhka isaga iyo Cristiano ka dhaxeeyaa yahay mid aad u fiican balse uu sabab taatiko u fadhiisiyay oo ay doonayeen ciyaar ka duwan mida uu Ronaldo xulka kusoo kordhiyo.
“Anigu xidhiidh aad u dhaw ayaan la leeyahay, waxaan garanayaa tan iyo markii uu 19 sano jirka ahaa ee Sporting joogay kaddibna waxa uu bilaabay inuu horumaro markii aan xulka imid 2014” ayuu yidhi Fernando.
“Aniga iyo Ronaldo marnaba kuma qaladno dhinaca shaqsiyada iyo bini-aadanimada mida tababaraha iyo ciyaartoyga. Anigu markasta waxaan u arkaa inuu yahay ciyaartoy ay muhiim tahay in xulka lagu haystaa”.
“Waxaanu doonaynay ciyaartoy ku ciyaaraya qulqul badan, si aad u wanaagsan ayaanu u ciyaarnay, waxaanu ahayn koox qulqulaysay, kubadda ayaanu haysanay”.
“Waxaanu qabnay aaminaad badan, waxaanu ku ciyaarnay ka go’naansho iyo midaw badan taasna waxa ka falcelinaya awooda aanu kubadda dib ugu guuleysanaynay, waxkasta si aad u wanaagsan ayay u shaqeeyeen”.
