Xidhiidhka kubadda cagta Brazil ayaa raadinaya tababare cusub kaddib markii uu iska casilay Tite kaddib guul-darradii ay kala kulmeen Croatia oo rikoodheyaal ku garaacday wareegga siddeedda Koobka Adduunka.
Tite ayaa si degdeg ah ugu dhawaaqay inuu iska casilay xulka Selecao waxyar kaddib markii ay soo dhamaatay ciyaartii Croatia, isaga oo soo afjaray muddo lix sannadood iyo badh ah oo uu xulka dalkaas laylinayay.
Brazil ayaa haysata tiro magacyo tababareyaal ah oo ay kala dooranayso, hase yeeshee doorkan waxay doonayaan in ay xulkooda u dhiibaan macallin ajanabi ah oo aan dalkooda u dhalan, si uu usoo celiyo kubaddii quruxda badnayd ee konton sannadood ka hor ay dunida ku qabsadeen.
Sida uu qoray wargeyska Sport oo uu soo xigtay Express, xidhiidhka kubadda cagta Brazil ee magaciisa loosoo gaabiyo CBF ayaa waxa uu isku diyaarinayaa xidhiidh uu la sameeyo tabaabaraha kooxda kubadda cagta Manchester City ee Pep Guardiola oo la sheegay inuu meel weyn kaga jiro qorshahooda.
Ednaldo Rodrigues oo ah madaxweynaha xidhiidhka kubadda cagta Brazil ayaa la sheegay inuu qaatay masuuliyadda ah inuu Pep Guardiola si shaqsi ah uga dhaadhiciyo inuu la wareego xulka ugu guulaha badan dunida ee Brazil, balse lama hubo sida uu ugu guuleysan karayo inuu Guardiola ku qanciyo arrintaas.
Guardiola oo ahaa tababaraha Manchester City tan iyo July 2016, ayaa waxa uu dhowaan saxeexay heshiis cusub oo saddex sannadood ah oo soconaya illaa xagaaga 2025 oo uu kusii joogayo Etihad Stadium, balse CBF ayaa rumaysan in haddii uu Guardiola go’aansado inuu xulkooda hoggaamiyo, inay si fudud ku burburin karayaan heshiiskiisa.
Pep Guardiola oo lagu tilmaamo tababaraha ugu wanaagsan Premier League, sidoo kalena hormoodka macallimiinta adduunyada ka mid ah ayaa waxa uu shaqada tababarenimada soo bilaabay sannadkii 2008 oo uu qabsaday Barcelona, taas oo ay uga horreysay muddo kooban oo uu talyaaniga soo joogay. Laga soo bilaabo waqtigaas, waxa uu Guardiola soo layliyey 782 ciyaarood oo kooxaha Barcelona, Bayern Munich iyo Manchester City.
579 ciyaarood oo ka mid ah kulamadaas ayaa uu guuleystay, inta kalena waxay isugu jiraan guul-darrooyin iyo barbarro.
Waxa kale oo uu ku guuleystay afar horyaal oo Premier League ah, saddex horyaal oo La Liga ah, saddex horyaal oo Bundesliga ah, laba UEFA Champions League oo waqtigiisii Barcelona iyo koobab kale.
15ka sannadood ee uu ku jiray xirfadda tababarenimada, waxa uu Pep Guardiola ku guuleystay 32 koob oo naadiiyadii kala duwanaa ee uu soo layliyey ah.
