Wakhtigii uu sida kumeel gaadhka ah Ralf Rangnick u joogay shaqada tababarenimo ee Man United ayaa ahaa mid aan u fiicnayn in badan oo xiddigaha kooxdaas kamid ah.
Mudada uu Rangnick joogay ayuu safka kooxda oo uu marka horeba isagoo aad u liita u yimid qolka labiska ku kala qaybsamay iyagoo ku dhammaystay dhibcahoodii ugu xumaa taariikhda Premier League.
Laakiin sidoo kale Rangnick ayaa bilaha uu Old Trafford joogay sii qishay nidaamka ay tahay in kooxdu u ciyaarto iyo sida aysan u anfacayn xiddigo badan oo da’ weyni iyo magac weyni isku darsaday oo uu Ole Gunnar Solskjaer kooxda keensaday.
Mid kamida waraysiyada Rangnick lagu xasuusto ayaa ah inuu sheegay in kooxdu 10 ciyaartoy oo cusub u baahantahay kaddib guuldarro 4-0 ah oo Liverpool kaga soo gaadhay Anfield.
Si kastaba, haatana wargeyska The Bild ee Germany ayaa banaanka soo dhigay magacyada saddex xiddig oo uu macalinka ree Germany u arkayay kuwa dila dareenka wanaagsan ee kooxda.
Saddexdaas xiddig oo laba kamid ahi kooxda xagaagii ka tageen ayaa kala ah Edinson Cavani oo haatan Valencia jooga, Paul Pogba oo Juventus ku laabtay iyo Anthony Martial oo wali kooxda ku sugan.
Erik Ten Hag ayaa go’aansaday inuu qorshihiisa ku darsado Martial gaar ahaan kaddib markii uu isla xagaagiiba qas abuuray Cristiano Ronaldo.
