Kabtanka xulka Portugal ee Cristiano Ronaldo oo haatan koox la’aan ah ayaa daboolka ka qaaday xaqiiqada wararka sheegaya haddii uu la heshiiyay kooxda ree Saudi Arabia ee Al Nassr.
Bishii hore ayay ahayd markii uu si wadajir ah Man United ula kansalay heshiiskii uu kula jiray kaddib waraysi uu bixiyay oo aysan maamulka kooxdaasi jeclaysan.
Tan iyo markii la xaqiijiyay inuu xor yahay oo koox la’aan yahay, waxa waxbadan laga qorayaa mustaaqbalka 37 sano jirkaas.
Isniintii ayay ahayd markii ay soo baxeen warar sheegaya in Ronaldo qarka u saaran yahay inuu heshiis laba sano iyo badh ah ugu biiro Al Nassr iyadoo sanadkii lacag ku dhaw 200 Milyan oo euro uu mushahar u helayo.
Si kastaba, kaddib kulankii xalay ee Switerland ay 6-1 kaga adkaadeen ee uu Ronaldo kursiga keydka kusoo bilawday ayuu ka hadlay haddiiba uu jiro heshiis uu la gaadhay kooxda Saudi-ga ah.
“Maya, taasi run maaha, run maaha” ayuu Ronaldo u sheegay saxafiyiinta kaddib kulankii koobka aduunka ee xalay isaga oo waxba kama jiraan ku sheegay warkii wargeyska Marca qoray.
Al Nassr ayaa ah mid kamida kooxaha ugu guulaha badan Saudi-ga iyagoo sagaal horyaal oo midkii ugu dambeeyay 2019 ahaa kusoo guuleystay.
