Kooxda culayska badan saaran yahay ee Leicester City ayaa caawa waayi doonta dersin ka mid ah xiddigaheeda kooxda koowaad, iyadoo tababare Brendan Rodgers uu dib ugu laabanayo kooxdiisii hore ee Liverpool oo ay marti ugu noqonayaan Anfield.
Liverpool ayaa haddii ay ciyaartan guuleysato waxay soo yarayn doontaa farqiga kaalinta afraad, iyadoo sidoo kalena ay u noqon doonto guushii afraad ee Premier League ee xidhiidh ah.
Reds ayaa xilli ciyaareedkani aadugu adkaa, waxaana waqti horeba aad u yaraatay fursadda ay ugu tartami karayaan horyaalka kaddib guul-darrooyin iyo barbarro aan looga baranin oo wadartoodu le’ekaatay kulamadii ay guuleysteen.
Leicester City oo kaalinta 13aad ku jirta, ayaa ogsoon in haddii laga badiyo ay hoos u dhici doonaan oo ay kulaali doonaan casaanka, waxaanay Anfield tegayaan iyadoo ay ka maqan yihiin lix ciyaartoy oo muhiim ah.
Rodgers oo saxaafadda la hadlayay ayaa xaqiijiyey in James Maddison uu dhaawac yahay oo aanu ciyaari doonin kulankan, waxaanu yidhi: “Waa uu tababaranayaa, kulamadana diyaar ayuu u noqonayaa, laakiin wali waxa uu xanuun ka dareemayaa jilibka. Kooxda caafimaadku waxay leeyihiin waa ku degdeg kulankani.”
Waxa kale oo ka maqan difaaca muhiimka ah ee Jonny Evans iyo sidoo kale Ricardo Pereira, James Justin, Ryan Bertrand iyo Dennis Praet.
Dhinaca kale, Liverpool ayaa iyadana ay ka maqan yihiin lix ciyaartoy oo muhiim ah oo wadarta xiddigaha labada kooxood ka maqnaanaya kulanka ka dhigaya 12 ciyaartoy.
Reds ayaa waxay liiska ciyaartoydeeda ka reebtay xiddigaha dhaawaca ah ee Roberto Firmino, James Milner, Curtis Jones, Luis Diaz, Diogo Jota iyo Arthur Melo.
