Weeraryahan Karim Benzema ayaa shalay oo ahayd maalin kaddib markii xulka France waayay Koobka aduunka uu ku dhawaaqay inuu ka fadhiistay gabi ahaanba xulkaas.
Benzema ayay isku dhaceen markale tababare Didier Deschamps iyadoo aad loo hadal hayay inuu macalinkaasi kasoo caydhiyay xulka Les Bleus kaddib dhaawacii gaadhay kahor bilaabashadii Koobka Aduunka.
Mustaqbalka tababare Deschamps ayaa la go’aamin doonaa toddobaadyada soo socda waxaana la filayaa inuu la kulmo madaxweynaha xidhiidhka kubadda cagta France ee Noel La Graet.
Benzema ayaa sidoo kale diiday marti qaad uu Finalka ku daawan lahaa si lamid ah xiddigaha kale ee France ka maqnaa kaddib isku dhaca isaga iyo Deschamps.
Haatan wargeyska Foot Mercato ayaa sheegaya in Karim uu kusoo laaban doono xulka France haddii loo magacaabo tababare Zinadine Zidane oo ay wakhti dahabi ah kusoo wada qaateen Real Madrid isla markaana asxaab dhaw yihiin.
Deschamps ayaa isagu shaqsiyan diiday inuu caddeeyo haddii uu tababaraha France sii ahaanayo kaddib guuldarradii Koobka aduunka.
