Kooxda Chelsea ee uu mulkiyadeeda inta ugu badan leeyahay Bilyaneer Todd Boehly ayaa markale suuqa January lala xidhiidhinayaa weeraryahanka Man United ee Cristiano Ronaldo.
Blues ayaa lagu xamanayay saxeexa 37 sano jirkaas suuqii xagaaga balse wararka ayaa markaas sheegay in tababarihii wakhtigaas ee Thomas Tuchel uusan doonayn saxeexiisa.
Mulkiile Boehly ayaan wali ka quusan saxeexiisa oo markale isku dayi doona January walow ay warar cusubi xusayaan in tababare Graham Potter qudhiisu uusan ogolayn.
Haatan wargeyska The Mirror ayaa sheegaya in Chelsea isku diyaarinayso saxeexa Ronnie balse ay kaliya u dhaqaaqi doonaan haddii ay Man United caydhiso oo heshiiskiisa kansasho.
Xidhiidhka Ronaldo iyo Manchester ayaa sii xumaaday maalmihii ugu dambeeyay iyadoo Cristiano dhawaan bixiyay waraysi muran xoogan abuuray oo uu ku dhaliilay kooxda.
Cristiano ayay jirtaa suurogalnimo badan oo uusan markale ugu safanayn Red Devils kaddib waraysigaas oo uu ku dhaliilay tababare Erik Ten Hag, mulkiilayaasha, da’yarta kooxda, iyo xiddigo hore.
