Kooxda kubadda cagta Arsenal ayaa war kasoo saartay difaaceeda Ben White oo xalay iskaga tegay xulka qaranka England ee ku sugan waddanka Qatar ee ka qayb-gelaya Koobka Adduunka, kaddib saddex ciyaaarood oo aanu midkoodna safanin oo uu kursiga kaydka ku caajisay.
Ben White ayaa xanuun kaga maqnaaday ciyaartii xulka qaranka England uu 3-0 ku garaacay Wales, taas oo uu tababare Gareth Southgate xaqiijiyey in aanu taam u ahayn.
Harry Maguire iyo John Stones ayaa ah labada difaac dhexe ee xulka qaranka England sida joogtada ah ugu soo bilowday kulamadii illaa hadda ay ciyaareen, waxaase sidoo kale dookh ahaa Conor Coady iyo Eric Dier, halka Ben White isagana ay fursaddiisu aad u yarayd.
Xidhiidhka kubadda cagta Ingiriiska ee FA ayaa shaaciyey, in Ben White uu sababo shaqsi ah uga tegay xulka qaranka England ee qaadanaya tababarka ay ugu diyaar-garoobayaan ciyaarta Senegal ee wareegga 16ka Koobka Adduunka, isla markaana aanu dib ugu soo noqonayn.
War-saxaafadeed uu soo saaray xidhiidhka kubadda cagta Ingiriiska ayaa lagu yidhi: “Ben White waxa uu ka tegay xarunta tababarka England ee Al Wakrah, waxaanu sababo shaqsi ah ugu laabtay hoygiisa.
“Difaaca Arsenal lama filayo inuu kusoo laabto xulka inta ka hadhay tartanka. Waxa aanu dalbanaynaa in la ixtiraamo arrimaha shaqsiga ah ee ciyaartoyga waqtigan.”
Kooxda kubadda cagta Arsenal ayaa iyaduna dhinaceeda waxay soo saartay qoraal kooban oo ay ku garab istaagay Ben White oo afar ciyaarood u saftay xulka qaranka England oo aan inta badan loogu yeedhin.
Gunners ayaa qoraalkeeda kooban ku tidhi: “Waanu ku garab taaganahay Ben.”