Tababaraha kooxda kubadda cagta Manchester City ee Pep Guardiol ayaa ku hanjabay inuu iska casili doono oo uu iskaga tegi doono kooxdaas, kaddib barbarrihii niyad-jabka ahaa ee ay Sabtidii la galeen Everton oo ku qabatay 1-1.
Manchester City ayaa lumisay laba dhibcood, waxaana ka faa’iidayasatay Arsenal oo sii dheeraysatay hoggaanka oo hadda toddoba dhibcood oo nadiif ah ku haysa hoggaanka Premier League.
City oo gool la hormartay ciyaartii Etihad Stadium ee Sabtidii oo uu mishiinkooda goolasha ee Erling Haaland daqiiqaddii 21aad u saxeexay kubbad uu kasoo shaqeeyey Riyad Mahrez, ayaa waxa ka daba yimid Demarai Gray oo qaubtii labaad Everton u keenay goolka barbarraha, taas oo ka lumisay labada dhibcood ee fursadda siiyey Arsenal.
Gunners ayaa iyaduna waxay 4-2 kaga takhalustay Brighton, waxaanay ku naalloonaysaa hoggaan aan cidhiidhi ku jirin oo xataa laba ciyaarood oo isku xiga haddii laga baadiyo ay wali sii haysanayso hoggaanka.a
Pep Guardiola oo heshiis cusub oo soconaya illaa sannadka 2025 dhowaan saxeexay, ayaa waxa uu ciyaartii Everton kaddib sheegay, in ay suurtogal tahay inuu is-casilo haddii uu dareemo in ay wax qaldan yihiin, waxaanu yidhi: “Marka aan dareemo in ay wax qaldan yihiin, waan is-casili doonaa ama heshiiskii cusbaa ayaan meesha ka saari doonaa.
“Anigu majoogi doono sidii Sir Alex Ferguson ama Arsene Wenger. Heshiiskaygu kaliya waa warqad, waan dheereeyey waqtigayga kooxda sababtoo ah waxa aan dareemayay in ay wali kooxdu wax fiican samayn doonto aniga oo hoggaaminaya, laakiin haddii natiijadu xumaato oo aanu isku daalno, iskama joogi doono sababtoo ah in aan kaliya heshiis kula jiro. Waan iscasili doonaa.”
