Real Madrid ayaa u muuqata mid aan wali ka tanaasulin rabitaankeedii weeraryahanka Paris Saint-Germain ee Kylian Mbappe oo ay ku hungowday xagaagii inay hesho.
Xiddiga kusoo guuleystay Kabta dahabka ah ee gool-dhalinta Koobka aduunka ayaa la filayay inuu Paris xagaagii ka tago oo kooxda ree Spain xor ugu biiro balse waxa uu si lama filaan ah u saxeexay heshiis ilaa 2024 gaadhsiisan oo sanadka saddexaadna dookh yahay.
Real Madrid ayay wararku sheegayeen inay ka cadhaysan tahay 24 sano jirkaas maadaama ay saxeexiisa ku tashanayeen balse Florentino Perez ayaa u muuqda mid aan wali ka quusan.
Sida lagu sheegay wargeyska La Gazzetta dello Sport, Perez ayaa diyaar u ah inuu Kylian bangiga u jabiyo isagoo u qorsheeyay saxeexiisa lacag 1 Bilyan oo euro tagaysa.
Lacagtaas ayaa 630 Milyan oo euro oo kamid ahi yihiin mushaharka Mbappe iyo gunnooyinkiisa isku gayn mudo qandaraas mudo afar sano ah, 150 Milyan oo euro ayay u qorsheeyeen inay iibkiisa ka bixiyaan waxaana inta kale noqonaysaa lacagta xaqal-saxeexa ee Mbappe qaadanayo iyo mida wakiilada.
Mbappe ayaa shalay kusoo laabtay tababarka PSG isagoo soo gaabiyay fasaxiisii kaddib Koobka aduunka isagoo isku diyaarinaya qaybta dambe ee xilli ciyaareedka iyo riyada weyn ee kooxdiisa ee Champions League.
