Suuqa qaboobaha ee bisha January ayaa inagu soo wajahan, Barcelona ayaa markale si adag uga shaqaynaysa inay kooxdeeda ka dirto xiddigaha ay u aragto inaysan qorshaheeda ku jirin.
Waxa xiddigahaas kamid ah weeraryahanka Dutch-ka ah ee Memphis Depay oo bixitaan lala xidhiidhinayay tan iyo suuqii xagaaga, ciyaaryahanka qudhiisa ayaa intii Koobka aduunku socday qirtay inuu bixitaankiisu suurogal yahay.
Iyadoo heshiiskiisa Camp Nou yahay mid dhacaya dhammaadka xilli ciyaareedkan ayay Barca doonaysaa inay lacag ka samayso suuqa January oo ay iibiso halkii uu xor kaga tagi lahaa xagaaga.
Sida uu sheegayo qoraaga wargeyska Marca ee Mari Carmen Torres, Depay ayaa wali ku jira liiska doonista kooxo badan oo Yurub ah walow ay awoodi waayeen inay xagaagii Camp Nou ka furtaan.
Warbixinta ayaa sheegaysa in Memphis isagu shaqsiyan uu doonayo inuu dhammaysto heshiiskiisa Barca oo uu kaddib xagaaga isagu kala doorto kooxaha sida xorta ah ku doonaya.
