Mid ka mid ah kooxaha ugu cajiibsan ee dunida ka dhisan waa koox ka ciyaarta horyaalka ee Chile ee kooxda CD Palestino iyagoo matalaya Falastiin oo ah wadan u jira 13 kun kiilomitir.
Laga soo bilaabo 1850meeyadii ilaa bilowgii 1900aadkii dad badan oo Falastiniyiin ah ayaa lagu qasbay inay qaxooti u noqdaan dalalka deriskooda ah sida Jordan iyo Syria.
Laakiin dad badan ma ogsoona xaqiiqda ah in ku dhawaad 500 kun qof oo Falastiiniyiin ah inay u qaxeen caasimada dalka Chile ee Santiago.
1920meeyadii rag ka tirsan qaxootiga Falastiiniyiinta ayaa aas-aasay koox kubada cagta ah iyadoo ujeedkooda uu ahaa in kooxda ay faa’ido u noqoto bulshada qaxootiga Falastiiniyiinta ee halkaas degay.
Chile waxaa haatan degan mid ka mid ah bulshooyinka ugu balaaran Falastiiniyiinta ee meel ka baxsan Falastiin. Waxaa iyadana xiiso leh in CD Palestino inay tahay kooxda kaliya ee dunida ee ay qaxooti dhiseen.
34 sannadood ka dib kooxda Palestino waxay ku guuleysatay inay gashay wareega guruubyada ee koobka Copa Libertadores oo ah Champions League-ga Latin America.
Waxay sidoo kale ku guuleysteen horyaalka heerka koowaad ee Chile ee Primera Division labo jeer oo kala ah 1955kii iyo 1978kii.
CD Palestino waa wax ka weyn kaliya koox kubadeed waa koox mataleysa bulshada reer Falastiin iyagoo weli aan ilaawin halkii ay ka soo aas-aasmeen.
Dhanka kale Falastiin ayaa sidoo kale udub dhexaad ka noqotay Koobka Adduunka ee ka socda dalka Qatar iyadoo calanka Falastiiniyiinta uu qabsaday garoomada Koobka Adduunka.
Ciyaartoyda iyo taageerayaasha xulka Morocco ayaa si weyn u soo bandhigay calanka Falastiin.