Garabka weerar ee kooxda Shakhtar Donestk ee Mykhaylo Mudryk ayaa markale qishay sida uu qalbigiisu u joogo Arsenal oo lala xidhiidhinayo saxeexiisa.
Kulankii hore ee Arsenal guusha ka gaadhay West Ham United ayuu Mudryk soo dhigay qaybta “Story” ee bartiisa Instagram inuu daawanayo ciyaartaas oo uu la socdo.
Markale kulankii ay Gunners xalay guusha weyn ee muhiimka ah kasoo gaadheen Brighton ayuu soo dhigay sawirka Mikel Arteta iyo Roberto De Zerbi oo ah tababarihiisii hore ee Shakhtar isagoo kusoo dul-qoray “Laba tababare oo heer sarre ah”.
De Zerbi iyo Mudryk ayaa kusoo wada shaqeeyay Shakhtar markii tababaraha 43 sano jirka ahi xilli ciyaareedkii hore maamulayay kooxdaas kahor inta uusan Brighton usoo wareegin.
De Zerbi oo saxaafada la hadlay kahor kulankan xalay ayaa sheegay in Arsenal helayso ciyaartoy mustaqbalka Ballon d’Or ku guuleysan kara haddii ay Mykhaylo la saxeexato.
21 sano jirkaas ayay sanadkii labaad oo xidhiidh ah taageerayaasha Shakhtar u doorteen xiddiga sanadka kooxdooda Jimcihii.
Arsenal ayaa la filayaa inay dalab kale ka gudbiso Mudryk dhawaan xilli ay wali socdaan wadahadalka ay kula jiraan Shakhtar.
