Tababarihii hore ee Manchester United ee Sir Alex Ferguson ayaa farriin hambalyo ah u diray Jurgen Klopp ka hor ciyaarta Liverpool iyo Chelsea ee Anfield, taas oo noqonaysa kulankii 1,000aad ee uu Jurgen Klopp yahay tababare.
Klopp ayaa buuxiyey tirada afar god ee tababarenimada, waxaana uu taariikhdan ku samaynayaa kulanka Chelsea ee Anfield oo uu u dagaallami doono inuu guuleysto si ay diiwaankiisa ugu gasho taariikh ah inuu guul kusoo xidhay tirada 1,000 ciyaarood oo uu tababare ahaa.
Ferguson oo ka mid ah tababareyaasha ugu waqtiga dheeraa ayaa waxa uu macallin ahaa 2,062 ciyarood, waxaana uu hambalyo u diray Jurgen Klopp oo qoraal uu u diray uu ku yidhi: “Waxa aan ku faraxsanahay in aan ugu hambalyeeyo Jurgen Klopp in uu 1,000 ciyaarood tababare ahaa.
“Jurgen waxa uu shaki la’aan ka mid yahay tababareyaasha ugu hibada badan kubadda cagta, waxaanu leeyahay samir iyo dulqaad suurtogal uga dhigay inuu noqdo tababare lagu daydo. Koobab badan oo ay ku jiraan Chakpions League iyo Premier League ayuu kusoo guuleystay, waxayna caddaynaysaa inuu ka mid yahay tababareyaasha haldoorka ah ee kubadda cagta.”
Jurgen Klopp oo ay da’diisu tahay 55 jir ayaa waxa uu sannadkii 2001 ka bilaabay tababarenimada kooxda reer Germany ee Mainz oo uu muddo toddoba sannadood ah laylinayay, waxaana uu usii dhaafay Borussia Dortmund sannadkii 2008 isaga oo laba jeer u qaaday horyaalka Bundesliga. Toddoba sannadood oo uu joogay Dortmund kaddib, waxa uu sannadkii 2015 usoo wareegay Liverpool oo uu u qaaday koobkeedii lixaad ee Champions League ah, iyadoo sannadkii 2020 uu soo afjaray 30 sannadood oo ay Reds ka qatanayd horyaalka Premier League.
