Jude Bellingham waa mishiinka khadka dhexe iyo sirta ku jirta xulka qaranka England ee Koobka Adduunka, waana laacibka ugu wanaagsan ee illaa hadda ku jira ciyaartoyda dalkaas marka laga eego dhinac walba. Kulankii Senegal ee wareegga 16ka ayaa uu mar kale soo bandhigay ciyaar aad u sarraysa oo aanu jirin qof kale oo kala sinnaa oo ku jiray garoonka.
19 jirkan oo xilli ciyaareedkan si fiican kula bilowday Borussia Dortmund ayaa qaab ciyaareedkiisii Bundesliga ula soo baqoolay Qatar oo uu halkiisii kasii waday.
Mrka laga hadlayo ciyaartoyda ugu wanaagsan ee uu tababare Gareth Southgate u diyaarsanayo ciyaarta Faransiiska ee Sabtida, waxa ugu horreeya Bellingham oo ah mishiinka ay tahay in uu joojiyo Antoine Griezmann, Adrien Rabiot iyo Aurelien Tchouameni, halka ciyaartoyda kalena ay sugayso shaqo ah inay xidhaan Mbappe iyo Ousmane Dembele.
Arrinta xiisaha leh ee noqotay su’aasha ay maanta saxaafadda Ingiriisku is-weydiinayaan ayaa waxay tahay sababta uu Bellingham u doortay inuu No.22 u xidho xulka qarankiisa England iyo sidoo kale kooxdiisa Borussia Dortmund, isaga oo awooda oo inta badan ka ciyaara booska No. 4, 8 ama 10, kuwaas oo ay ahayd inuu midkood qaato lambarradooda.
Mike Dodds oo ah tababarihii hore ee da’yarta kooxda Birmingham ee uu kasoo baxay Bellingham, ayaa ka sheekeeyey sababta iyo sirta ka dambaysa in uu Bellingham xidho No.22, waxaanu yidhi: “Waxay da’diisu ahayd 13 ama 14 jir, inta badan carruurta da’daas ahna waxay doonaan No10.
“Waxa aan xasuustaa in aan meel la fadhiistay oo aan ku idhi, ‘waxa aanu ku fikiraynaa in aad qaadato No.22.’ Kor ayuu eegay, waxaananu ogeyn in aanu ka cadhoonay. Maalintii xigtay ayuu noo yimid, waxaana uu nagu yidhi, ‘waxa aan doonayaa in lambarkayga kooxdu uu noqdo No22’. Sidaas oo kale ayuu ku yidhi Borussia Dortmund.”
