Jurgen Klopp ayaa doonaya in lasoo dedejiyo waqtiga uu Cody Gakpo u ciyaarayo Liverpool kaddib markii ay heshiiskiisa si rasmi ah loogu dhawaaqay xalay, hase yeeshee laacibkan ayaa loo diiday oo dib loo dhigay xilliga uu ciyaartiisa koowaad dheeli doono.
Cody Gakpo ayaa muddo tababarka kooxdiisa la qaadan doona oo aan u ciyaari doonin, inkasta oo Arbacadii uu ka gudbay tijaabada caafimaadka sidoo kalena uu lasoo bandhigay oo uu qandaraas lix sannadood ah qalinka ku duugay.
Xiddiga reer Netherlands oo saddex gool kasoo dhaliyey Koobkii Adduunka ayaan waqti badan oo tababar ah u baahnayn maadama aanu fasax dheer gelin, hase yeeshee haddana waxa dib loo dhigay xilliga uu ciyaartiisa koowaad u safanayo Reds.
Labada ciyaarood ee adag ee Leicester City oo Jimcaha ah iyo Isniinta oo ay la dheeli doonaan Brentford ayaa loo sheegay Gakpo in aanu ciyaari doonin, sida ay saxaafadda Ingiriisku ku warramayso, taas oo ka hor imanaysa wixii uu tababare Jurgen Klopp doonayay.
23 jirkan oo Khamiista maanta tababarka buuxa la bilaabaya kooxdiisa Liverpool ayaa waqti ku filan u haysta in uu iskugu diyaariyo ciyaarta Brentford ee London ay kooxdiisu safarka ku tegayso, hase yeeshee waxa uu hadda isku diyaarin doonaa ciyaarta January 7 ee FA Cup ee Wolves.
Sababta aanu Gakpo dib loogu dhigay waqtiga uu Gakpo kulankiisa koowaad u ciyaarayo Liverpool ayaa lagu sheegay in diiwaangelintu aya furmayso January 1, waana xilliga ay Reds gudbinayso liiska ciyaartoydeeda kulanka Brentford, taas darteedna waxa uu shaki ku jiraa in diiwaangelintiisa laga gaadhsiinayo.
