Casharkii ay Qatar iyo FIFA u dhigeen wadamada reer galbeedka ee doonayay in dal Muslim ah ku soo bandhigaan caalamada qoomu luudka ayaa isku bedeshay inay kaliya uga jawaab celiyaan inay afka gacanta saartaan sida ay sameeyeen xulka Jarmalka ka hor kulankii Japan.
Madaama FIFA ay ka mamnuucday wadamada reer Galbeedka inay xirtaan marada kabtanka One Love ee lagu taageerayo qoomu luudka, ciyaartoyda Jarmalka ayay tamartoodii noqotay inay afka gacanta saartaa si ay u muujiyaan in la aamusiyay.
Xiriirka kubada cagta Jarmalka ayaa xaqiijiyay in ciyaartoyda xulka ay la yimaadeen fekerkaan, sida ay sheegtay The Athletic.
Warbixin calaacal ah oo ay xiriirka kubada cagta Jarmalka soo dhigeen bogooda Twitter ayay ku yiraahdeen:
“In naloo diido marada kabtanka One Love waxay la mid tahay in naloo diiday inaan hadalno. Waan ku adkeysaneynaa go’aankeena.
“Waxaan dooneynay inaan marada kabtanka ku muujino qiimaheena, waxaan dooneynay in codkeena la maqlo.”
Laakiin FIFA ayaa diiday in dalalka reer Galbeedka ay dhaqankooda la yimaadaan dal Muslim ah oo ka dhaqan duwan. Waxayna FIFA ku eedeysay dalalka reer Yurub ee duraya Qatar labo wajiilenimo.
Dalalka Yurub mudaharaad iyo cabasho intaan la eg ma aysan sameynin afar sannadood ka hor markii Koobka Adduunka lagu qabtay Ruushka oo sidoo kale ay mamnuuc ka tahay qooma luudnimada.
