Ciyaartii Leicester City ee horraantii bishan ee King Power Stadium, Harvey Barnes ayuu ahaa ciyaartoygii garabka midig baaba’saday ee dhibaatada badan ku keenay Diogo Dalo. Markii uu difaaca reer Portugal kubbad xerada ganaaxa dhexdeeda ahayd isku-dhigay ayuu dabbaal-degay, ka hor intii aanu ku guuleysanin in uu sameeyo goolka guusha.
Erik ten Hag ayay u ahayd maalin adag, laakiin ugu dambayntii uu qosolka la hoyday oo ay kooxdiisu bandhig fiican iyo saddex dhibcood isku darsaday. Lisandro Martinez ayaa ciyaartaas xabbadka garaacday oo muujiyey qaab-ciyaareed fiican, sida kubbadaha sare oo uu ku adkaaday, iyo in aanu ka gabbanayn khataraha oo uu isku dhigayay. Waxa kale oo is-muujiyey Raphael Varane, Scott McTominay iyo Diogo Dalot.
Tababaraha reer Netherlands oo ay kooxdiisu maalmihii ugu dambeeyey si adag iskugu diyaarinayeen kulanka Manchester Derby ee ay Axadda ku booqan doonaan Etihad Stadium kooxda horyaalka difaacanaysa ee Manchester City, waxa Ten Hag uu qolka labbiska United keenay hal arrin oo ka cadhaysiisa Pep Guardiola oo uu doonayo in kooxdiisu la tagto Etihad Stadium.
Sida laga arkay tababarkii Khamiistii iyo Arbacadii ee ciyaartoydii waqtiga hore kasoo laabtay kulamada caalamiga ah iyo kuwii sii joogay, Erik ten Hag ayaa waxa uu kooxdiisa u carbinayay in ay noqoto mid dhiirran oo sidii dagaal oo kale ku ciyaaraysa kulanka.
Waxa ciyaartoyda sida gaarka ah indhuhu u hayeen ka mid ahaa Lisandro Martinez oo caadifaddiisa iyo dhiiggiisa kulul aan marnaba qarsan karin, waxaase deggenaan iyo khibrad ku ladhayey Raphael Varae oo ciyaartii xulkiisa ee Axaddii la nasiyey.
Diogo Dalot oo gool-dhaliye isku beddelay kulamadii xulka qarankisa Portugal ayaa isagana meel gaar ah uu tababaruhu dhegta wax ugu sheegayay, si uu sare ugu sii qaado ciyaartiisa, gaar ahaan difaaca iyo weerarka oo ah labada shaqo ee waaweyn ee laga doonayo in uu qabto kulanka Etihad Stadium.
Arrinta ka cadhaysiinaysa Pep Guardiola ee uu waliba aadka u neceb yahay ee ciyaartoyda Manchester United uu Erik ten Hag ku laylinayay toddobaadkan ayaa ahayd, in cadaadis la saaro ciyaartoyda kasoo horjeedda, in khadka dhexe lagu dagaallamo gaar ahaan kubbadaha sare iyo baaska oo aan la ogolaanin iyo arrinta kale oo ahayd in lagu ciyaaro niyad, isla markaana wax naxariis iyo jixin-jix ah aan loo samaynin ciyaartoyda Manchester City. Waxa kale oo uu Ten Hag ku carbinayay xiddigihiisa in ay ciyaaraan kubbad weerar ah, caadifad ku ladhan tahay iyo in maskaxdooda ay geliyaan in ay ka adkaanayaan Man City.
Inkasta oo Ten Hag uu ogyahay in Man City ay kaga gacan sarrayn doonto kubbad-haynta, haddana waxa uu ciyaartoydiisa u sheegay in ay jiraan meelo ay iyaguna kaga xooggan yihiin City, sida isticmaalka awoodda jidheed, dhiirranaan lagu dheelo iyo in aan wax fursad ah la siinin. Waxa uu tusaale ugu soo qaatay kulamadii Newcastle United iyo Aston Villa oo waqti hore min laba gool ka dhaliyey Manchester City.
