Weeraryahanka kooxda kubadda cagta AC Milan iyo xulka qaranka Sweden ee Zlatan Ibrahimovic ayaa sheegay in Koobka Adduunka ee finalkiisa Axadda la ciyaarayo uu yahay mid lasii ogyahay cidda ku guuleysanaysa oo hore looga sii shaqeeyey, isla markaana ay tahay in aan la isku daalin ee kaliya la sugo inta uu dhamaanayo si horyaalladu dib ugu bilowdaan.
Zlatan Ibrahimovic oo ay da’diisu tahay 41 jir, ayaa lagu yaqaanaa hadallo badan oo muran dhaliya, kuwaas oo saxaafadda u noqda cinwaanno ay muddo soo celceliyaan.
Ibrahimovic oo wax laga weydiiyey saadaashiisa Koobka Adduunka, kaddib markii uu Faransiisu Arbacadii ka adkaaday Morocco ee finalka kula ballamay Argentina ayaa waxa uu si fudud u yidhi: “Waxay ila tahay in mar horeba lasii qoray cidda ku guuleysanaysa Koobka Adduunka.”
Waxa uu sii raaciyey: “Waad garanaysaan waxa aan u jeedo…”
Wariyaha waraysiga ka qaadayay Zlatan Ibrahimovic ayaa ka dalbaday inuu hadalkiisa caddeeyo, waxaanu Ibra ku jawaabay: “Waxay ila tahay in Koobkan uu qaadayo Lionel Messi, ma horena waa loosii go’aamiyey.”
Zlatan Ibrahimovic iyo Lionel Messi ayaa usoo wada ciyaaray Barcelona intii u dhaxaysay 2009 illaa 2011, waxaase la xasuusan yahay in aanay isku fiicnayn oo uu marar kala duwan hoos u dhigay tayada xiddiga reer Argentina.
