Sida ay sheegayaan warar cusubi, saddexda kooxood ee kala ah Real Madrid, Manchester City iyo Chelsea ayaa ah kuwa ugu cad cad loolanka loogu jiro da’yarka daafaca dhexe ee xulka Croatia iyo kooxda RB Leipzig ee Josko Gvardiol.
Gvardiol oo 20 sano jir ah ayaa lagu sifayn karaa daafacii ugu fiicnaa Koobka aduunka isagoo xilli ciyaareedkii hore boos joogto ah ka helay Leipzig isla markaana durba 19 jeer soo metelay dalkiisa.
Dortmund ayaa sanadkii 2020 heshiis 16 Milyan oo euro ah kagala wareegtay Gvardiol kooxdiisii hore ee RB Leipzig, lacagtaas ayaan haatan waxba ahayn oo ay mid saa’id uga badan ka samayn doonaan iibkiisa.
Warbaahinta ayaa sheegaysa in Gvardiol uusan mustaqbalkiisa fog ka dhex arag Leipzig balse heshiiska uu ku joogo ayaa ah mid gaadhsiisan ilaa 2027 taas oo ka dhigan inuusan joogin boos uu gorgortan ka galo.
Sida uu sheegayo wargeyska Mirror, Chelsea ayaa haatan in mudo ah qorshaynaysay inay Leipzig kala wareegto Gvardiol si lamid ah sida weeraryahanka kooxdaas ee Christopher Nkunku oo ay kala heshiisay qiimihiisa xagaaga dambena kusoo wajahan Stamford Bridge.
Warbixinta Mirror ayaa sheegaysa in Real Madrid qorshaheedu yahay inay xagaaga dambe dalab ka geyso Josko balse Chelsea ay diyaar tahay suuqa January,
Leipzig ayaa haatan kaliya lix dhibcood u jirta hoggaanka horyaalka Bundesliga taas oo adkayn doonta inay badhtamaha xilli ciyaareedka iska iibiso xiddig muhiim u ah.
Ugu dambayn, wargeyska The Sun ayaa isaguna sheegay in Man City ay diyaarinayso dalab guud ahaan 110 Milyan oo pound tagaya oo ay Gvardiol ka gudbinayso.
