Chelsea ayaa waxa gilgily dhaawac cusub oo laa filayo inuu waqti dheer qaato oo xalay soo gaadhay Reece James kulankii ay guusha weyn ka gaadheen Bournemouth.
James oo ay u ahayd ciyaartiisii koowaad ee tan iyo markii uu kasoo kabtay dhaawac jilibka kasoo gaadhay bishii October oo uu ku seegay Koobka Adduunka, ayaa waxa xalayna isla jilkibka kasoo gaadhay dhaawac kale oo sababay in isaga oo ooyaya laga saaro garoonka.
23 jirkan ayaa garoonka ku jiray 53 daqiiqadood oo kaliya, waxaana uu dareemay xanuun isaga oo garoonka dhaxdiisa jiibsaday oo madaxa qabsaday markii uu awoodi waayey inuu sii wato ciyaarta. Daaweyn kooban oo garoonka dhexdiisa loogu sameeyey kaddib waxa laga saaray ciyaarta.
Dhaawacan oo la filayo inuu ugu yaraan muddo siddeed usbuuc ah u jiifi doono Reece James ayaa waxa ka hadlay tababare Graham Potter oo yidhi: “Wax badan kama ogi illaa hadda. Waxaynu arki doonaa 24ka illaa 48ka saacadood ee soo wsocda, laakiin niyad-jab ayay nagu tahay in aanu si degdeg ah u weyno.”
Potter oo la weydiiyey halka uu dhaawacu kasoo gaadhay Reece James ayaa yidhi: “Waa isla halkii uu hore uga dhaawacnaa, waana sababta aanu u walaacsanahay. Waxaynu arki doonaa 24/48 saacadood ee soo socda. Wali waa waqti hore balse faraha ayaanu is-dhaafsanay walaac dartii.
“Dabcan isaguna wuu niyad-jabsan yahay. Waqtigan waxa aanu rajaynaynaa in aanu dhaawac halis ah noqon laakiin walaaciisa ayuu leeyahay.”
