Saaxiibbo isku dheer ayaa iskaaga hor iman doona semi-finalka Koobka Adduunka, kuwaas oo midkood uu ooyi doono isaga oo murugaysanna ku laaban doono dalkiisa, halka uu midka kalena dabbaal-degi doono oo isaga oo faraxsan uu isku diyaarin doono finalka.
Xiddigaha Paris Saint-Germain ee Kylian Mbappe iyo Achraf Hakimi ayaa iyaga oo kala metelaya waddamadooda France iyo Morocco iska hor iman doona Khamiista, waxaanay illoobi doonaan saaxiibtinimadii kooxda iyada oo mid walba uu u dagaallami doono difaaca dalkiisa.
Mbappe ayaa markii ay Morocco kasoo adkaatay Portugal waxa uu u diray hambalyo degdeg ah saaxiibkiisa Achraf Hakimi, ka hor intii aanay Faransiisku kasoo adkaanin England ee aanay semi-finalka iman.
Xiddiga xulka France ee Kylian Mbappe ayaa diray digniin culus mar wax laga weydiiyey Morocco, waxaana uu sheegay in uu doonayo in uu burburiyo xiddig ay saaxiibbo yihiin, kaas oo ah Achraf Hakimi oo ay waliba si toos ah iskaga hor imanayaan.
Mbappe oo ka ciyaara garabka midig, waxay isku boos noqonayaan Hakimi oo ay tahay inuu xidho, halka isaguna uu doonayo inuu burburiyo.
Isaga oo ka jawaabaya su’aal laga weydiiyey ciyaaartan iyo inay iska hor imanayaan Achraf Hakimi, ayaa waxa uu Kylian Mbappe oo dhoola-caddaynaya, una muuqanaya in uu kaftamayo, waxa uu yidhi: “Waa in aan burburiyo saaxiibkay. Waxa aan doonayaa in aan burburiyo.”
