Xulka qaranka Australia ayaa guul cidhiidhi ah ka gaadhay Tunisia kulan xiise badnaa oo isku sii murgiyey Group-ka D ee Koobka Adduunka, halkaas oo afarta waddan ee ku jira uu mid walba dagaallamayo illaa ciyaarta ugu dambaysa.
Australia oo ciyaartii koowaad guul-darro 4-1 ah kala soo kulantay Faransiiska ayaa waxay saddex dhibcood ka xoogsatay Tunisia oo iyadna kulankii hore barbarro goolal la’aan ah la gashay Denmark.
Ciyaar xiise badnayd oo ka dhacday garoonka Al Janoub Stadium oo ay inta badan maamulayeen xiddigaha Tunisia ayaa waxa goolka madiga ah ee Australia ay guusha ku heshay madax ugu dhaliyey Mitchell Duke daqiiqaddii 23aad ee qaybta hore.
Tunisia ayaa heshay fursado badan oo labadii qaybood ah oo aanay ka faa’iidaysanin, waxaana si adag ula halgamay goolhaye Mathew Ryan oo sameeyey badbaadin badan.
Souttar ayaa dibedda u saaray kubbad uu isku dhigay Drager oo ay taageereyaasha garoonka joogay iyo kuwa daawanayayba u qaadan waayeen sida ay ku geli weyday shabaqa, ka hor intii aanu Msakni shabaqa la seegin kubbad uu Jebali ugu keenay xerada ganaaxa oo kaliya u baahnayd inuu dhinaca goolka u leexiyo.
45kii daqiiqadood ee qaybta dambe ayay Tunisia iska maamulanaysay ciyaarta, iyadoo Australia ay xidhatay difaaca oo ay kaliya weerarrro rogaal-celin ah samaynaysay.
Sliti iyo Jebali ayaa kubbad ay keeneen xerada ganaaxa waxa laad xor ah loogu dhigay Laidouni oo laad xor ah kaga toogtay masaafo 25 yard ah, balse waxay kubaddu ku dhacday McGree.
Dhamaadkii ciyaarta ayay ciyaartoyda Tunisia oo gool raadinayay iska illoobeen difaaca, waxaana laba weerar oo degdeg ahaa oo lagu soo qaaday ay halis geliyeen goolkooda, iyadoo ciyaartuna kusoo dhamaatay 1-0 ay guushu ku raacday Australia.
Group-ka D waxa hoggaaminaya xulka qaranka France oo caawa fiidka la ciyaaraya Denmark, waxaanay haystaan saddex dhibcood oo ay ka heleen kulankii koowaad, waxaana labaad fadhida Australia oo iyaguna saddex dhibcood leh, halka Denmark iyo Tunisia ay min hal dhibic leeyihiin.
