Kooxda kubadda cagta Tottenham ayaa u dagaallantay barbarro waqti dambe ah oo ay dhibic kaga xoogsatay Brentford oo laba gool kala hormartay labadii qaybood ee ciyaarta kulan kusoo dhamaaday 2-2.
Tottenham ayaa iska lumisay fursad ay kaalinta saddexaad ee horyaalka Premier League ku cidhiidhsan lahayd, isla maarkaana ay dhibco ahaan kula sinmi lahayd Manchester City oo booska labaad kaga jirta miiska kala-sarraynta, waxaana fursaddaas ka diidday Brentford oo ay ku dhacday nasiib-darro isla markaana qaybtii dambe ogolaatay in ay Spurs meesha ka saarto laba gool oo ay la hormartay.
Laba gool oo lix daqiiqadood gudahood u dhaxeeyeen oo ay kala dhaliyeen Harry Kane iyo Hojbjerg ayaa Tottenham siiyey dhibcic ay ka xoogsatay Brentford oo 2-0 ku hoggaaminaysay ciyaarta.
Daqiiqaddii 15aad ayay Brentford hoggaanka u qabatay ciyaarta kaddib markii kubbad uu goolhaye Fraser Foster uu soo tufay uu goolka hortiisa ka helay Vitaly Janelt oo uu si fudud shabaqa u gaadhsiiyey.
Goolkan ayaa ahaa midka kaliya ee ciyaarta ee qaybtii hore, hase yeeshee Brentford ayaa sidoo kale la timid gool qurux badan oo uu u dhaliyey weeraryahanka reer England ee Toney, balse markii uu dabbaal-degga bilaabay lagu wargeliyey in uu offside ku jiray.
Tababare Antonio Conte oo ay kooxdiisu tabaysay xiddiga Brazil ee Richarlison ee dhaawaca kaga maqnaa, ayaa si adag u dagaallantay qaybtii dambe, hase yeeshee Brentford ayaa kaga nixisay gool labaad oo shaki aan la gelinin oo Ivan Toney uu daqiiqaddii 54aad ciyaarta kaga dhigay 2-0.
Thomas Frank ayay kooxdiisu is-dhigatay markii ay labada gool la yimaaddeen, waxaanay u qaateen inay guuleysteen taas oo keentay in Tottenham ay ka daba timaaddo oo ay labada goolba dhaliso.
Harry Kane ayaa madax ku qabtay kubbad uu dhinaca midig kasoo qaaday difaaca amaahda ay kaga soo qaateen Barcelona ee Clement Lenglet, waxaana uu ku hubsaday shabaqa daqiiqaddii 65aad.
Kabtanka xulka England oo kaalinta labaad kaga jira tartanka kabta dahabka ah ee gool-dhalinta oo uu ka horreeyo Erling Haaland ayaa si weyn ugu dabbaal-degay goolkiisan, maadaama uu dib usoo nooleeyey kooxdiisa oo ay haysteen waqti badan.
Shan daqiiqadood oo kaliya kaddib ayay Tottenham dhalisay goolkeeda labaad ee barbarraha oo uu u saxeexay Hojbjerg oo xerada ganaaxa ka helay kubbad uu kasoo shaqeeyey Dejan Kulusevski, waxaanay sidaas ciyaartu ku noqotay 2-2.
Tottenham ayaa dhamaadkii ciyaarta dalbatay in rikoodhe loo dhigo, hase yeeshee garsooraha ayaa ku wargeliyey in uu jiray offside.
Ciyaarta ayaa kusoo dhamaatay 2-2 ay dhibcaha ku wadaageen Tottenham iyo Brentford, waxaanay taasi ka dhigan tahay in Spurs ay ku jirto kaalinta afraad oo ay haysato 30 dhibcood, waxaanay farqiga goolasha kaga dambeeyaan Newcastle United oo inkasta oo ay mar dhow ciyaarayso haddana sii xajisatay kaalinteedii saddexaad.
