Xiddig ka tirsan kooxda kubadda cagta Barcelona ayaa shaaciyey inuu waqti tijaabo ah ku tegay Real Madrid ka hor intii aanu ka mid noqonin Barcelona oo uu hadda ka mid yahay xiddigaha ay ku xisaabtamayaan ee uu tababare Xavi Hernandez ka sugayo inay naadiga dib ugu soo celiyaan heerkii lagu yaqaanay ee ay hoos uga dhacday labadii sannadood ee ugu dambeeyey.
Khadka dhexe ee Spain ee Pedri ayaa hore u sheegay in uu waqti tijaabo ah kusoo qaaday Real Madrid balse aanay Los Blancos la saxeexan, laakiin waxa hadda isaguna shaaciyey in sidaas oo kale ay dhacday weeraryahanka Ansu Fati oo ka mid ah xiddigaha da’yarta Spain ee ugu cadcad waqtigan.
Ansu Fati oo sannadkii 2019 usoo dallacay kooxda koowaad iyadoo ay da’diisu tahay 16 jir ayaa waxa illaa hadda u saftay kooxdiisa 55 ciyaarood oo horyaalka LaLiga ah, balse waxa dib u dhigay dhaawacyo waqti badan uu u jiifay oo xakameeyey fursadihiisa iyo korriinkiisa ciyaareed.
Fati ayaa waraysi siiyey wargeyska France Football, waxaana uu daboolka ka qaaday inuu tegay Real Madrid ka hor intii aanu ku biirin kulliyadda da’yarta Barcelona ee La Masia, waxaanu yidhi: “Waxa aan ka qayb-galay tartamo Futsal ah oo ka dhacay Spain aniga la ka mid ahaa Peloteros. Waxa aanu ku guuleysanay tartanka oo lagu ciyaaray Madrid. Waxa kasoo qayb-galay, Alletico, Real Madrid iyo Getafe. Ka hor intii aanan u saxeexinBarca, waxa aan tijaabo ugu tegay Real Madrid.
“Waqtigaas kooxdu ma aanay haysanin meel ay dejiso ciyaartooyda da’da yar. Kaddib wada-hadallo dhexmaray aabbahay, waxa aanu go’aansanay in dookha wanaagsan uu yahay La Masia, marka aanu ka eegnay kubadda cagta iyo waxbarashadaydaba.”
