Tababaraha kooxda Manchester United ee Erik Ten Hag ayaa shaaca ka qaaday sida uu saxeexa burburiyaha khadka dhexe ee Casemiro muhiim ugu ahaa kooxdiisa xagaagii.
Tababaraha Dutch-ka ah ayaa Man United kusoo biiray kahor bilaabashada xilli ciyaareedkan xilli uu xilli ciyaareedkii hore kooxdaas mid madaw u ahaa.
Ten Hag oo kusoo biiray United kaddib wakhti guul ah oo uu Ajax lasoo qaatay ayaan bilaabashadiisa Red Devils xumayn kaddib 15 guulood oo uu ka helay 22 kulan oo tartamada oo dhan ah.
Erik ayaa sheegay in markii uu kooxda imanayay uusan wax dareen ahi ka dhex jirin qolka labiska oo kooxdu ahayd mid aan lahayn dareen dagaal sidaas darteed uu la saxeexday Casemiro oo ah mid garanaya waxa loo baahan yahay si guulo loo gaadho.
“Wax dareen xamaasadeed ahi ma jirin (Qolka labiska), wax dhaq-dhaqaaq kooxeed ah kooxda kama arkayn. Adayga maskax ahaaneed wuxuu ahaa mid aad u hooseeya, inuu midkoodba midka kale u dagaalamo, in muhiimada koowaad kooxda la siiyo, taasi dhab ahaan kooxda dhexdeeda kama jirin” ayuu yidhi Ten Hag.
“Inaan dhaqanka bedelaa waxa ugu muhiimsan ayay ii ahayd aniga, si aan sidaas uga helo (Qolka labiska) waxaad u baahantahay shaqsiyaad waaweyn, taasi waa sababta iibka Casemiro aad muhiim ugu ahayd, isagu wuxuu dedejin karaa nidaamkayaga sababtoo ah wuu ogyahay waxay tahay inaad samayso si aad koobab ugu guuleysato”.
