Xidhiidhka kubadda cagta Brazil ayaa wali ku jira kala doorashada liis tababareyaal ah oo ay doonayaan in ay midkood u magacaabaan xulka qaranka dalkaas ee uu dhowaanta iska casilay Tite markii ay wareegga siddeedda kaga hadheen Koobkii Adduunka ee Qatar.
Brazil oo shan jeer ku guuleysatay Koobka Adduunka ayaa ku hadhay meel aan la filayn sannadkan, waxaana iyaga oo ahaa xulka loogu saadaalin badan yahay ay ku hadheen wareeggii siddeedda, iyadoo ay Croatia ku garaacday rikoodheyaal.
Saacado kaddib markii ay hadheen waxa shir jaraa’id qabtay tababare Tite oo sheegay inuu iska casilay shaqada, taas oo ka dhigtay Brazil in ay noqoto tababare la’aan.
Sida uu qoray wargeyska La Repubblica ee kasoo baxa waddanka Talyaaniga, xidhiidhka kubadda cagta Brazil ayaa waxay mar horeba go’aansadeen in tababare ajaanib ah ay u dhiibaan xulka qaranka maadaama 20 sannadood ay kasoo wareegtay xilligii ugu dambaysay inay ku guuleystaan Koobka Adduunka.
Sababta ay go’aankan u qaateen ayaa ah inay doonayaan in la hirgeliyo falsafad cusub oo ciyaareed oo ka duwan middii reer Brazil oo kaliya iyagu noqon jiray maacallimiinta xulka.
La Repubblica waxa uu sheegay in xidhiidhka kubadda cagta Brazil ay xidhiidh la sameeyeen tababaraha reer Portugal ee Jose Mourinho oo ay doonayaan in uu isagu noqdo tababarhahooda cusub, laakiin aanu kalidii ahayn ee ay sidoo kalena indhaha ku hayaan Carlo Ancelotti oo qandaraaskiisa Real Madrid uu ku egyahay sannadka 2024.
Wargeyska La Repubblica waxa uu intaa ku daray, in Brazil ay wada-hadallo toos ah kula jirto wakiilka Jose Mourinho ee Jorge Mendes oo ay isla eegayaan fursadda uu Special One ku noqon karayo tababaraha cusub ee Brazil isaga oo iskaga tegaya kooxdiisa Roma.
Jose Mourinho ayaa ka mid ah tababareyaasha ugu khibradda badan dunida waqtigan, waxaana uu kusoo guuleystay horyaallada dalalka Portugal, England, Spain iyo Italy, halka uu sidoo kalena laba Champions League qaaday.
