Weeraryahanka xulka Morocco iyo kooxda Sevilla ee Youssef En-Nesyri ayaa kulankii dhawaan ay guusha taariikhiga ah ku dhigeen Portugal sidoo kale isagu taariikh u gaar ah ku samaystay.
En-Nesyri ayaa dhaliyay goolka kaliya ee lagu kala baxay qaybtii hore isagoo madax cajiib ah ka dul-booday goolhaye Diogo Costa iyo daafaca dhexe ee Ruben Dias.
Rekoodhka Youssef jabiyay ayaa ah bootinta ugu dheer ee gool madax ah lagu dhaliyo oo uu haystay isla Cristiano Ronaldo oo kursiga keydka ka daawanayay.
Goolka uu Ronaldo ku haystay rekoodhka bootinta ugu dheer ee gool madax ah lagu dhaliyo ayuu ka dhaliyay kooxda Sampdoria xilli uu Juventus u ciyaarayay sanadkii 2019.
Sida uu sheegayo il-wareedka GOAL gaar ahaan qaybtiisa Spain, Ronaldo ayaa booday goolkaas uu Sampdoria ka dhaliyay 2.56 meter.
Youssef En-Nesyri oo ay FIFA ugu wacday kaddib goolkaasi “Midkii cirka soconayay” ayaa isagu dhigay rekoodhka cusub ee ah inuu booday 2.78 meter.
