Taageerayaasha kubada cagta ayaa isku raacay in goolhaye Thibaut Courtois inuu mas’uul ka ahaa guuldaradii weyneyd ee xulka Shayaadiinta Cas Cas ka soo gaartay Morocco oo 2-0 ku badisay.
Belgium ayaa Koobka Adduunka ku bilaabatay guul ciriir ah iyagoo 1-0 uga badiyay Canada Arbacadii hore.
Waxayna u muuqdeen kuwa kala daadsan kulankii maanta ee Morocco, iyagoo dharbaaxo xun kala kulmay xulka Waqooyiga Afrika.
Hakim Ziyech ayaa moodayay inuu Morocco hogaanka u dhiibay markii uu laad xor ah dabamariyay goolhaye Courtois laakiin goolkaas waa la diiday.
Si kastaba, Morocco ayaa ugu danbeyn hogaanka qabatay markii uu qeybtii labaad laad xor ah u dhaliyay Abdelhamid Sabiri.
Laakiin taageerayaasha ayaa ku eedeeyay goolhayaha Real Madrid inuu qalad ku lahaa goolkaas ka dhashay.
Mid ayaa ku soo qoray Twitter: “Courtois inay badbaadiyo ayay aheyd.”
Mid labaad ayaa yiri: “Courtois laad xor ah ayaa laga dhaliyay. Taageerayaasha Real Madrid waxay ku dhaaranayeen inuu ka fiican yahay Ter Stegen. Qosol waxaan aheyn iima furna.”
Mid seddexaad ayaa soo qoray: “Miyaan haatan joojin karnaa beenta iyo inaan dadka ka dhaadhicino in Courtois uu ka fiican yahay Alisson.”
Taageere Liverpool ah ayaa soo qoray: “Alla haddii Courtois sidaan u dheeli lahaa finalkii Champions League.”
Mid kale ayaa yiri: “Muxuu Courtois sidaan u ahaan waayay markii aan la ciyaareynay finalka Champions League.”
Courtois waxaa digniin u aheyd goolkii qeybta hore ee la diiday laakiin wuu awoodi waayay inuu celiyo laadkii xorta ee qeybta labaad iyadoo xulkiisa uu haatan halis ku jiro.
Morocco ayaa gool labaad dhalisay waqtigii dhimashada markii Ziyech uu kubad u celiyay Aboukhlal kaasoo shabaqa meel kore ka toogtay.
Sida haatan kala sareyntu tahay Morocco ayaa seddex dhibcood ku hogaamineya Group F halka Belgium ay kaalinta labad u soo dhacday. Waxayse wax walba isbedeli karaan ka dib natiijada Canada iyo Croatia.
