Sannado badan ayaa abaal-marinta Ballon d’Or loo arkayay abaal-marinta ugu qaalisan ee uu ciyaartoy si shaqsi ah ugu guuleysan karayo, laakiin ka warran haddii xagga hore lagaga daro ‘Super’?
Abaal-marintii ugu horreysay ee Ballon d’Or waxa la bixiyey sannadkii 1956kii oo ahayd waqtigii uu wargeyska France Football hindisay in xiddiga ugu fiican sannad kasta lagu maamuuso abaal-marintan, inkasta oo ay ku koobnayd ciyaartoyda reer Yurub illaa laga soo gaadhayay sannadkii 1995kii.
Laakiin waxa kale oo jirtay abaal-marin kale oo qaali ah oo ay xidhiidh leeyihiin Ballon d’Or oo kaliya hal ciyaartoy uu ku guuleystay, hal mar oo kali ahna la bixiyey, waana ‘Super Ballon d’Or’ oo kasii qaalisan abaal-marinta hadda aad aragto ee ciyaartoydu ku guuleystaan ee Ballon d’Or.
Halyeygii Real Madrid ee Alfredo Di Stefano ayaa ah ciyaartoyga kaliya ee ku guuleystay Super Ballon d’Or illaa hadda, mana jiro ciyaartoy kale oo raadkiisa raacay oo abaal-marintan la siiyey.
Di Stefano oo 308 gool u dhaliyey Real Madrid, sidoo kalena qayb weyn ka qaatay shantii koob ee Yurub ee ay kooxda reer Spain ku guuleysatay intii u dhaxaysay 1956kii illaa 1960kii, ayaa laba jeer ku guuleystay Ballon d’Or sannadihii 1957kii iyo 1959kii. Laakiin soddon sannadood kaddib abaal-marintiisa labaad, wargeyska France Football ayaa u sameeyey maamuus gaar ah, waxaana la guddoonsiiyey Super Ballon d’Or.
Sannad-guuradii 30aad ee aas-aaska wargeyska ama majaladda [Magazine] France Football, ayaa la naqshadeeyey Super Ballon d’Or oo la siiyey Alfredo Di Stefano oo u dhashay Argentina una ciyaaray illaa sannadkii 1949kii, laakiin ka tegay oo haddana u ciyaaray xulalka Colombia iyo Spain oo uu iyagana dhalashooyinkooda qaatay. Waqtigaas ciyaartoyga laguma xaddidayn inuu kaliya hal waddan u ciyaaro, waxaana uu awood u lahaa inuu u dheelo xulka dal kasta oo uu dhalashadiisa qaato.
Johan Cruyff iyo Michel Platini ayaa ku jiray ciyaartoydii u sharraxnaa Super Ballon d’Or ee la tartamaysay Di Stefano, balse waxa laga doorbiday halyeyga Real Madrid oo markii u dambaysay ayaa ciyaartoy reer Spain ah oo u dheela xulka qaranka Spain, waana sababta uu ugu guuleystay labada Ballon d’Or iyo Super Ballon d’Or maadaama ay gaar ku ahaayeen ciyaartoyda reer Yurub.
Si kastaba, taageereyaasha kubadda cagta ayaa maalmihii ugu dambeeyey bilaabay olole ay kaga dalbanayaan wargeyska France Football in uu Lionel Messi siiyo abaal-marinta Super Ballon d’Or maadaama uu toddoba jeer ku guuleystay Ballon d’Or, haddana uu xulkiisa Argentina u qaaday Koobka Adduunka.
