Madaxweynaha xidhiidhka kubadda cagta Sucuudiga ayaa sheegay in ay been tahay oo aanay haba yaraatee jirin wax ballan-qaad ah oo ay u sameeyeen ciyaartoyda markii ay ka badiyeen Argentina.
“Waxay u ciyaarayeen sharafta dalkooda oo ay matalayeen.” Ayuu yidhi Madaxweynaha xidhiidhka kubadda cagta Sucuudiga Yasser Al Misehal oo u warramayay wargeyska Marca ee kasoo baxa waddanka Spain.
Waxa uu intaa ku daray: “In badan oo ka mid ah ciyaartoydu, waxaabay caan noqdeen markii ay garaaceen Argentina. Mana jirto wax loo ballan-qaaday oo la siinayo. Ciyaartoydayadu waxay matalayeen sharafta qarankooda.
“Nasiib iyo sharaf ayayba u ahayd in ay u ciyaareen dalkooda oo ay taariikh ka keeneen ciyaartii Argentina. Wararka la isla dhex marayo been ayay ahaayeen. Dabcan ciyaartoydu way helayaan abaal-marin, laakiin waxay noqon doontaa mid caadi ah,”
Yasser Al Misehal waxa kale oo uu ka hadlay ciyaartoygii ka dhaawacmay xulkiisa kulankii Argentina ee Al-Shahrani, waxaana uu xaqiijiyey in uu fiican yahay oo uu soo kabanayo, balse lagu sameeyey saddex qalliin oo kala duwan.
