Tababaraha kooxda kubadda cagta Crystal Palace ee Patrick Vieira ayaa canaan u jeediyey goolhayaha xulka Argentina ee Emiliano Martinez oo uu ku tilmaamay ‘Stupid’ edeb-daran kaddib markii uu laacibkani ku maadaystay Kylian Mbappe oo xulkiisa Faransiiska ay rikoodheyaa kaga qaadeen Koobka Adduunka.
Argentina iyo France ayaa ciyaar 120 daqiiqadood socotay ku kala baxay 3-3 iyadoo Faransiiska uu saddexlayda u dhaliyey Kylian Mbappe, hase yeeshee rikoodheyaasha ayaa uu Emiliano Martinez wacdaro dhigay oo uu ka badbaadiyey Kingsley Coman halka Aurelien Tchouameni uu birta garabmariyey, taas oo keentay in Argentina ay 4-2 ku adkaato.
Inkasta oo uu Mbappe saddex gool oo ciyaarta gudaheeda ah iyo gool afraad oo rikoodheyaashii ahaa ka dhaliyey Emiliano Martinez, haddana goolhayaha Argentina ayaa laacibkan ku maadaystay isaga oo dabbaal-deggii Buenos Aires kasoo muuqday iyadoo uu haysto boombalo laga sameeyey sawirrada Mbappe.
Ciyaartoydii hore ee Faransiiska ayaa arrintan aad uga cadhooday, waxaana sidoo kale uu xidhiidhka kubadda cagta dalkaasi ka dalbaday FIFA in tallaabo anshax marin ah laga qaado Emiliano Martinez.
Patrick Vieira oo ka mid ahaa xiddigihii xulka qaranka Faransiiska ee ku guuleystay Koobkii Adduunka 1998, haddana ah tababaraha Aston Villa ayaa isaguna arrintan ka hadlay, waxaana uu Emiliano Martinez ku tilmaamay mid edeb daran.
Vieira oo la hadlayay saxaafadda ka hor kulanka Premier League ee Crystal Palace iyo Aston Villa ayaa yidhi: “Marka aad ka hadasho aflagaaddooyinkii iyo falcelintii uu helay kaddib Koobka Adduunka, waxay ila tahay in ciyaartiisa iyo sumcaddiisa shaqsiga ahba ay dhaawacayso.
“Sawirrada qaarkood oo aan ka arkay goolhayaha Argentina waxay ahayd mid hoos u dhigaysa meeqaamka guushii Argentina ee Koobka Adduunka. Anigu ma garanayo waxa ay uga baahnaayeen in ay sidaa sameeyaan [ku maadsiga Mbappe].
“Mararka qaarkood ma xakamayn kartid shucuurta dadka iyo go’aamadooda, laakiin waxa uu ahaa go’aan edeb-darro [stupid] ah oo uu sameeyey Martinez.”
