Xulka qaranka Spain ayaa dhulka jiid-jiiday oo si xun u ceebeeyey dhiggooda Costa Rica oo ay ku baabi’iyeen kulankooda koowaad ee Koobka Adduunka oo ka dhacay garoonka quruxda badan ee Al-Thumama Stadium, halkaas oo ay ugu soo awood sheegteen 7-0.
Lix ciyaartoy oo kala duwan ayaa qaybsaday shanta gool ee xulka qaranka Spain oo midkood rikoodhe ahaa, waxaana laba is-raacday wiilka uu tababare Luis Enrique soddoga u yahay ee Ferran Torres oo loo diiday fursad uu saddexlay ku raadsado.
Spain ayaan wax badan iskaga tirinin Costa Rica, waxaanay bilowgii ciyaartaba ka ilaalisay kubadda ka hor intii aanay goolasha ku farraqin shabaqooda. 
Daqiiqaddii 11aad ayuu Dani Olmo dhamaystiray baas qurux badan oo uu ka helay Gavi oo kubadda uga soo dhax-saaray dhawr difaacyahan, waxaanu la hor tegay goolhaye Keylor Navas oo ahaa geesi aan garab haysanin oo waayay cid ka joojisa kubbadaha daadka ah ee ku socday.
Waqti badan kuma aanay qaadanin Spain in ay sii dheeraysato hoggaanka ciyaarta, waxaana gool labaad oo qurux badnaa u saxeexay Marco Asensio oo daqiiqaddii 21aad lugta bidix ku dhamaystiray kubbad aanu joojin oo dhinaca bidix uu ka keenay Jordi Alba.
Goolkan waxa ka horreeyey dhawr fursadood oo dahabi ahaa oo ay ciyaartoyda Spain u dhowaadeen inay ku dheeraystaan hoggaanka, balse Olmo ayaa goolka la seegay fursaddii ugu fiicnayd ka hor intii aanu Ferran Torres khasaarin kubbad loo qaatay inay gool tahay.
Qalad ay difaaca Costa Rica ku galeen Alba ayaa waxa loo dhigay rikoodhe uu gool u beddelay Ferran Torres, iyadoo markii lagu soo noqday qaybta labaadna uu raaciyey goolkiisa labaad oo uu ciyaarta ka dhigay 4-0.
Spain wax naxariis ah uma aanay gelin dhiggooda Costa Rica, waxaanay is-raaciyeen saddex gool oo kale oo ay qabsadeen Gavi, Carlos Soler iyo Alvaro Morata, iyadoo ciyaartuna kusoo dhamaatay 7-0 ay guushu ku raacday Spain.
Guusha Spain ayaa ah natiijadii ugu weynayd ee laga diiwaangeliyo Koobka Adduunka ee ka socda waddanka Qatar, waxaanay dhaliyeen toddoba gool iyo waliba shabaqooda oo nadiif ah.
