Garsooraha reer Spain ee qaybiya kaadhadhka casaanka iyo huruudda ee Mateu Lahoz ayaa ugu dambayn la ciqaabay, kaddib markii uu ku ceeboobay kulamadii Catalan Derby ee Barcelona iyo Espanyol ee toddobaadkii hore iyo sidoo kale Koobkii Adduunka oo ciyaartii Argentina iyo Netherlands uu jabiyey rikoodhka kaadh-bixinta Koobka Adduunka.
Mateu Lahoz ayaa saddexdii ciyaarood ee ugu dambeeyey waxa uu bixiyey 31 kaadh oo huruud ah iyo afar kaadh oo casaan ah, waxaanay taasi keentay in laga saaro liiska garsooreyaasha horyaalka Spain ee LaLiga ee kulamada 16aad.
Lahoz ayaa loo xil-saaray inuu qabto kulankii Linares iyo Sevilla ee Copa del Rey, hase yeeshee waxa la shaaciyey in gebi ahaanba laga joojiyey horyaalka LaLiga ee kulamada 16aad ee usbuuca soo socda oo garoonka dhexdiisa iyo VAR intaba uu ka maqnaanayo.
Jamaahiirta kooxda kubadda cagta Barcelona oo wadnaha farta ku hayay ka hor ciyaarta Atletico Madrid ee Axadda ayaa waxa lagu wargeliyey in Mateu Lahoz aanu ku jirin liiska toddobaadkan, sida ay shaaciyeen guddia garsooreyaasha ee Spain.
Kulanka adag ee Atletico Madrid ay ku martigelin doonto Barcelona garoonka Metropolitano ayaa waxa loo magacaabay inuu dhaxdhaxaadiyo garosore Munuera Montero oo toddobaadkanna hayay ciyaartii Real Valladolid iyo Real Madrid ee lagu cunsuriyeeyey Vinicius Junior, taas oo lagu eedeeyey inuu joojin waayey ciyaarta iyadoo uu maqlayo jamaahiirta Valladolid oo midab-takoor ku samaynaya Vinicius.
Kulanka adag ee Real Madrid iyo Villarreal ayaa waxa loo magacaabay oo garsoore ka noqon doona Soto Grado iyadoo VAR uu ka caawin doono Iglesias Villanueva.
