Kooxaha Manchester United iyo Arsenal ayaa aad loola xidhiidhinayaa xiddiga xulka Portugal iyo Atletico Madrid ee Joao Felix, inkasta oo ay hadda soo baxayaan caqabado dhinaca dhaqaalaha ah oo ay kooxda reer Spain ku xidhayso naadiyadan, taas oo sababi karta in ay ka laabtaan damacii ay ku doonayeen inay kula saxeexdaan.
Suuqa January ee shalay furmay ayaa labada kooxood ee Manchester United iyo Arsenal ka raadinayaan weeraryahanno ay isku xoojiyaan, kaddib markii bixitaankii Cristiano Ronaldo ee Old Traffordiyo dhaawacii Gabriel Jesus ee Emirates Stadium.
Joao Felix oo 23 jirah ayaa la filayay inuu iskaga tago Atletico bishan January, iyadoo xurguf u dhaxaysa Diego Simeone ay soo baxday xilligii uu socday Koobka Adduunku. Atletico ayaa la rumaysan yahay inay aqbalayso inay laacibkan ku iibiso 100 milyan oo Euro, laakiin kooxaha Premier League ayaa ka cago-jiidaya inay bixiyaan lacagtaas, waxaanay ka doorbidayaan amaah lix bilood ah.
Sida uu qoray wargeyska The Athletic, Arsenal ayaa kaga hormartay Manchester United saxeexa amaahda ee laacibkan, inkasta oo dhinaca lacagta ay caqabad ka jirto. Xiddiga khadka dhexe ee reer Ghana ee Thomas Partey oo ay saaxiibbo yihiin Felix ayaa la sheegay inuu mar horeba la xidhiidhay laacibka reer Portugal oo uu ku qanciyey inuu yimaaddo Emirates Stadium.
Warka ayaa intaa ku daray, in Joao Felix uu qalbigiisu jiro Arsenal oo uu doonayo inuu ka garab ciyaaro Thomas Partey oo ay waqti fiican kusoo wada qaateen Atletico Madrid.
Si kastaba ha ahaatee, wariyaha ciyaarayaha David Ornstein ayaa sheegay, in Atletico Madrid ay dalbanayso €15 milyan oo Euro oo ah lacagta amaahda ee lixda bilood uu laacibkani kaga maqnaanayo iyo €6 milyan oo Gini oo mushaharka laacibkan ah, taas oo aanay kooxna aqbali karayn.
Laakiin dhinaca kale, waxa jira warar sheegaya in Atletico Madrid ay aqbali karayso €10 milyan oo Euro iyo mushaharka laacibkan oo ay bixiso kooxda doonaysa inay amaahda ku qaadato.
