Cristiano Ronaldo ayaa kulankiisii labaad ee Premier League ah kusoo bilaaban doona xilli ciyaareedkan, marka ay kooxdiisu maalinta Axadda iska xaadiriso Etihad Stadium oo ay ugu tegayso Manchester City, kulan lagu tilmaamay mid ka mid ah ciyaarihii ugu waaweynaa ee Manchester United ee sannadkan.
Red Devils ayaa waajihi doonta kooxda horyaalka difaacanaysa ee Man City oo xilli ciyaareedkan samaynaysa dhoolatus dhinaca gool-dhalinta ah oo uu hormood u yahay Erling Haaland, waxaanay ciyaartani imanaysaa iyadoo farqi shan dhibcood ah uu u dhexeeyo labada kooxood.
Pep Guardiola ayay kooxdiisu haysataa 17 dhibcood waxaanay ku jirtaa kaalinta labaad iyadoo hal dhibic ka hoosaysa Arsenal oo hoggaanka haysa, halka Manchester United ay shanaad fadhido oo ay leedahay 12 dhibcood.
Nasiin-darro, tababaraha cusub ee Manchester United ee Erik ten Hag waxa uu ka walaacsan yahay taam ahaanshaha weeraryahanka reer England ee Marcus Rashford oo uu shaki ku jiro in uu ciyaari doono kulankan, waxaana inkasta oo uu tababarka kusoo laabtay haddana la sheegayaa in uu khatar geli doono haddii uu kusoo bilowdo.
Rashford oo xilli ciyaareedkan dib u helay ciyaartiisii wanaagsanayd isla markaana dhaliyey saddex gool, laba kalena caawiyey lix ciyaarood oo horyaalka ah oo uu dheelay, waxa uu la dhibaatoonayaa dhaawac muruqa ah, waana isla duruufta uu ku jiro Anthony Martial oo isaguna inkasta oo uu tababarka kusoo laabtay haddana aan wali taam ahaansho buuxa helin.
Erik ten Hag ayaa waxa uu maanta tababarka kusoo dhoweeyey xiddiga 816-ka gool dhaliyey ee Cristiano Ronaldo oo ay u badan tahay in uu kusoo bilaaban doono afkahore ee weerarka, waxaana dhinacyada ka dheeli doona saxeexa cusub ee Antony iyo Jadon Sancho.
Lama-taabtaan waxa ahaan doona Bruno Fernandes oo khadka dhexe ah, waxaanay u badan tahay in uu Ten Hag kalsoonida siin doono Christian Eriksen iyo Scott McTominay oo ah labada ciyartoy ee inta badan xilli ciyaareedkan uu khadka dhexe kusoo wada bilaabay.
Tryell Malacia ayaa bandhig heersare ah ka samaynayay garoomada tana iyo markii ay Manchester United kala soo wareegtay Feyenoord, waxaanu sii wadan doonaa in uu booska ka xajisto Luke Shaw, halka Raphael Varane iyo Lisandro Martinez ay difaaca dhexe kusoo wada bilaaban doonaan iyadoo uu dhaawac soo gaadhay Harry Maguire oo marka horeba beddelka ku qornaa.
Waa tan shaxda macquulka ah ee Manchester United ay kula ciyaari doonto Manchester City:
