Kooxda kubadda cagta Arsenal ayaa Isniinta kusoo laaban doonta horyaalka ay shanta dhibcood ku hoggaaminayso ee Premier League kaddib lix toddobaad oo ay fasax kaga jirtay, waxaana ay garoonka Emirates Stadium ku qaabbili doontaa kooxda ay isku magaalada yihiin ee West Ham United.
Gunners ayaa siddeed dhibcood ku qaban doonta hoggaanka haddii ay ka adkaato kooxda ay deriska yihiin maadaama Man City oo labaad ku jirtaa ay Arbacada ciyaarayso.
Tababare Mikel Arteta ayaa madax-xanuun kula soo noqonaya horyaalka, waxaana uu haystaa mushkilad weyn oo aanu haysanin xilligii loo baxayay fasaxa Koobka Adduunka.
Xiddiga Brazil ee Gabriel Jesus ayaa kusoo dhaawacmay Koobka Adduunka, waxaana qalliin lagaga sameeyey jilibka uu ku maqnaan doonaa illaa bisha March, waxaana xal u baahan xiddiga beddelaya.
Intii lagu maqnaa Koobka Adduunka waxay Arsenal dib u heshay xiddiga da’da yar ee England ee Smith Rowe oo muddo dheer dhaawac ku maqnaa, waxaana uu noqon doonaa xalka mushkiladda dhaawaca ee Jesus. Arteta ayaa laga yaabaa inuu weerarka dhexe ka ciyaarsiisyo Gabriel Martinelli, garabka bidixna geeyo Smith-Rowe.
Wargeyska The Sun ayaa saadaaliyey in Martinelli uu kusoo bilaaban doono weerarka dhexe, isla markaana uu isbeddel ku iman doono qaabkii kooxdu ku ciyaari jirtay ee 4-3-3 oo ay u guuri doonaan 4-2-3-1.
Shaxda macquulka ah ee Arsenal kula ciyaari doonto West Ham
Arsenal XI: Ramsdale; White; Saliba; Gabriel Tierney; Xhaka, Partey, Odegaard; Smith Rowe, Saka; Martinelli.
