Man United ayay warar cusubi sheegayaan inay samaysay wax lagu magacaabay sharciga Ronaldo oo xadidaya mushaharaadka xiddigaha kooxdeeda.
Manchester ayaa mushaharka ugu macquulsan ee ay hadda kaddib bixin doonto ka dhigtay 200,000 oo pound toddobaadkii iyadoo ciyaaryahanka ugu horreeya ee uu saamaynayaa uu noqon doono goolhaye David De Gea.
Heshiiska uu De Gea ku qaato 375,000 oo pound toddobaadkii ayaa ah mid dhacaya dhammaadka xilli ciyaareedkan waxaana ay kooxdu miiska u saaraysaa mid mushahar dhimis weyn lagu sameeyay oo uu saxeexi doono amaba kooxda ka bixi doono.
Mushahar bixinta Man United ayaa laga badalayaa habkii maamulkii hore ee uu Ed Woodward hoggaaminayay markaas oo aysan kooxdu lahayn siyaasad xaga mushaharaadka ah.
Manchester ayaa lagu sifayn karaa kooxda ugu nidaamka xun kooxaha waaweyn xaga mushaharka waxaana tusaale u ah Ronaldo (500,000 oo pound toddobaadkii) Jadon Sancho (350,000), Marcus Rashford (300,000) Anthony Martial (250,000) iyo kuwo kale oo badan.
Tababaraha haatan ee Erik Ten Hag oo qas hore oo badan saxaya isla markaana kaashanaya Richard Arnold iyo John Murtough ayaa kahor tagaya waxa lagu magacaabo “Masayrka/Hinaasaha qolka labiska” ee mushaharku sababo.
Xiddigaha waaweyn ee Manchester haatan jooga sida Bruno Fernandes, Harry Maguire iyo Raphael Varane ayaa isku mushahar dhaw iyagoo u dhaxeeya 180,000 ilaa 200,000 oo pound toddobaadkii.
Sababta sharcigan loogu magacaabay sharciga Ronaldo ayaa ah inay Red Devils diidayaan hal ciyaartoy oo saa’id uga mushahar badan xiddigaha kale ee kooxda.
