England ayaa guul weyn ku bilaabatay wareega group-yada Koobka Adduunka iyagoo 6-2 ku xasuuqay xulka Iiraan.
Hadaba waxaan eegeynaa shan waxyaabood uu saxay tababare Gareth Southgate oo ku hogaamiyay guushii ay ka gaareen Iiraan.
Inuu dhisay Bellingham
Goolkii furitaanka ee Jude Bellingham waxay aheyd natiijada aaminaad soo dhismeysay in muddo ah oo tababaraha England Gareth Southgate u muujiyay da’ yarkaan.
Xiddiga khadka dhexe ee Dortmund kaliya waa 19 sanno jir laakiin wuxuu durbaba 18 kulan u saftay England isagoo u muuqday laacib weyn oo heer caalami ah kulankii galabta.
Kubadii madaxa uu hogaanka ugu dhiibay England ka hor waqtigii nasashada waxa ay dejisay walalkii England ka hor inta aysan goolal ku xaaqin Iiran. Wuxuu sidoo kale qeyb ku lahaa goolkii 3aad ee England.
Inuu Saka Ka Doortay Foden
Ka hor ciyaarta taageerayaasha England ayaa ka qeylinayay in xiddiga Man City Phil Foden kursiga keydka la dhigay, laakiin ugu danbeyn waxaa cadaatay in Southgate uu ku saxnaa inuu Saka ku soo bilaabo oo uu Foden keyd dhigo.
Xiddiga Arsenal ayaa muujiyay sababta uu u yahay laacibka Ingariiska isagoo dhaliyay labo gool oo midi ay aheyd gool aad u qurux badan.
Saka wuxuu u muuqdaa mid kursiga keydka ku sii heyn doono Phil Foden.
Inuu aaminay Sterling
Raheem Sterling qaab ciyaareed fiican uma soo bandhigeynin Chelsea xilli ciyaareedkan, laakiin maanta wuxuu cagta la dulmaray daafacyada Iiraan.
Marka la eego ciyaartoyda uu heysto Southgate ma jiri laheyn dad ka carooda in Sterling keyd la geliyo, laakiin wuxuu tababaraha kalsooni u muujiyay Sterling kaasoo isna ku abaalmariyay gool iyo qaab ciyaareed cajiib ah.
Afar daafac danbe
Southgate waxaa looga bartay inuu shan daafac danbe ku dheelo labadii tartan ee ugu danbeysay laakiin kulankii maanta wuxuu ku soo shirtagay 4-3-3, wuuna ku faa’iday.
Waxaana laga yaabaa inay sabab u aheyd xulka ay la ciyaarayaan madaama aysan dhicin in cadaadis badan la saaro daafacyada England laakiin waxay aheyd go’aan caqli ku dhisan oo natiijo weyn u keentay.
Super bedel Rashford
Marcus Rashford wuxuu dhaliyay goolkiisii ugu horeysay ee Koobka Adduunka isagoo garoonka ku jiray kaliya 49 ilbiriqsi, seddex taabasho ka dib wuxuu soo taabtay shabaqa.
Waqtigii uu goolka dhalinayay waxay aheyd muhiim madaama markaas ay Iiraan gool soo ceshatay. Southgate wuxuu durbaba helay xiddig uu ku tashan karo inuu bedel ku keeno haddii ay xaaladu xumaato.
