Kooxda kubadda cagta Manchester United ayaa hawlgal weyn bilowday saacado kaddib markii ay Liverpool ku garaacday saxeexay Cody Gakpo oo xalay laga afduubay, isla markaana heshiis waqti dheer ah u saxeexay Liverpool.
Man United oo si weyn loola xidhiidhinayay Cody Gakpo ayaa si lama filaan ah waxa uga hor-qaadday Liverpool oo xalay dhamaystirtay heshiiskiisa, iyada oo kasoo bixisay £37 milyan oo Gini oo kaash ah iyo lacago kale oo ku xidhnaan doona bandhiggiisa Anfield, taas oo wadarta lacagta ka dhigi doonta £50 milyan oo Gini.
Tababare Erik ten Hag ayaa la sheegay inuu ka cadhooday in weeraryahanka reer Netherlands oo uu aad u doonayay uu tago Liverpool, iyada oo waliba uu saacado ka hor xilliga uu laacibkani u saxeexay Liverpool uu Ten Hag saxaafadda u sheegay inuu u baahan yahay weeraryahan.
Sida uu qoray wargeyska The Sun, Manchester United ayaa iyada oo ka cadhaysan in Gakpo laga hor-qaaday waxay suuqa usoo gelaysaa si xooggan iyada oo ay miiskeeda saaran yihiin magacyada shan ciyaartoy oo uu ku jiro mid hore ugu soo fashilmay Old Trafford.
Ciyaartoyga koowaad ee Manchester United u calaamadsan ayaa ah 21 jirka reer Portugal ee Goncalo Ramos oo saddexlay ka dhaliyey kulankii Switzerland ee Koobka Adduunka, waxaana ku xiga oo isagana ay durba wada-hadal la bilaabeen wakiilkiisa weeraryahanka Joao Felix ee Atletico Madrid ku dhibaatoonaya laakiin wacdaraha ka dhigaya Koobkii Adduunka ee xulkiisa Portugal uu ku hadhay wareeggii siddeedda.
Waxa kale oo liiska ciyaartoyda ay Man United doonayso ku jira Yousoufa Moukoko oo ah 18 jir u dhashay Jarmalka oo u ciyaara Borussia Dortmund iyo gool-dhaliyaha Juventus ay bishii January ee sannadkii hore soo iibsatay ee Dusan Vlahovic oo 22 jir ah.
Ciyaartoyga shanaad ee ay Red Devils ku darsatay qorshaheeda ayaa ah Memphis Depay oo hore ugu fashilmay Old Trafford, kana tegay sannadkii 2017, kaas oo tababare Erik ten Hag uu rumysan yahay inuu usoo celin karo qaab-ciyaareedkiisii.
Shantan ciyaartoy ayay Manchester United kala-dooranaysaa oo ay midkood la saxeexan doontaa, si uu u noqdo weeraryahankooda dhexe ee buuxinaya booskii uu banneeyey Cristiano Ronaldo.
