In badan oo ka mid ahaa taageerayaasha xulka qaranka Qatar ayaa isaga tagay garoonka Al Bayt waqtgii nasashada ciyaarta ka dib markii ay arkeen xulkooda oo ay guuldarro ka soo gaareyso Ecuador.
Garoonka qaada in ka badan 67 kun islamarkaana qeybtii hore ahaa mid buuxay ayaa noqday faaruq markii laga soo laabtay waqtiga nasashada markaasoo Qatar lagu hogaaminayay 2-0.
Taageerayaashoo safray ee Ecuador ayaa si weyn u muuqday qeybtii labaad ee ciyaarta, halka ay sidoo kale hareen taageerayaashii Qatar ee xirnaa funaanadaha midabka burgandiga ee Qatar. Laakiin waxaa garoonka faaruqiyay shacabkii xirnaa khamiisyada iyo cabaayadaha ee sharxayay garoonka.
Waa markii ugu horeysay ee taageerayaasha xulka martigelinaya Koobka Adduunka ay faaruqiyaanka garoonka tan iyo markii ay taageerayaasha Brazil sidaas sameeyeen kulankii semi-finalka oo qeybtii hore ay 5-0 ku hogaamineysay Germany islamarkaana ciyaartaas 7-1 looga badiyay.
Laakiin lama filaan ayay aheyd in taageerayaasha Qatar ay garoonka baxaan iyagoo daawanaya kulankoodii ugu horeeyay abid ee Koobka Adduunka.
Waxay la ciyaarayaan xul aan sidaas u weyneyn oo Ecuador ah, inkastoo labo gool lagu lahaa hadana rajo ayay ka lahaayeen inay qeybta labaad soo noqdaan, balse waa ay dayaceen xulkooda.
Qatar waxay Koobka Adduunka ku qarashgareysay 220 bilyan doolar oo ah labo jibaarka intii lagu qarashgareeyay isku darka sideedii Koob Adduun ee ugu danbeysay.
Laakiin hadana Qatar waa ay ka gaabiyeen hal meel oo ay koontarooli waayeen, waana inay taageerayaashooda ku hayaan garoonka ilaa dhamaadkii ciyaarta.
Waxay tani ka horimaaneysaa fariintii dowlada Qatar ee aheyd in dadka reer Qatar ay aad u jaceyl yihiin kubada cagta oo ay yihiin taageerayaasha xamaasadeysan. Waana fariin ay soo bandhigeen markii ay ku guuleysanayeen martigelinta koobka sannadkii 2010kii.
