Xiddigaha da’yarta kooxda Chelsea ayaa lagu soo warramayaa inay cabsi ka qabaan kooxdooda gaar ahaan kaddib saxeexa garabka ree Ukraine ee Mykhailo Mudryk,
Chelsea ayaa dhawaan markale farriin awoodeeda dhaqaale ah dirtay iyadoo 100 Milyan oo euro kula saxeexatay Mudryk oo mudo lala xidhiidhinayay kooxda ay London wada degaan ee Arsenal.
Warkaas ayaa la sheegay inuu werwer iyo walaac ku abuuray xiddigaha kuliyada da’yarta Chelsea oo ka cabsi qaba in dhaqaalaha badan iyo saxeexyada badan ee kooxdu ay xanibaan fursadii ay kooxda koowaad ka heli lahaayeen.
Wargeyska The Telegraph oo ah midka xogtan baahiyay ayaa sheegaya inay jiraan waalid iyo wakiilo ka werwersan haddii xiddigahooda da’yarta ahi ay fursadii ay filayeen ka helayaan Blues.
Kooxaha horyaalka Germany ayaa la sheegay inay si gaar ah isha ugu hayaan xaalada kuliyada da’yarta Chelsea oo ay kala wareegi karaan qaar kamida da’yarta mustaqbalkooda u baqaya.
Xiddigaha ay kooxaha Germany ka qaateen Blues ayaa laga xusi karaa Jamal Musiala oo haatan Bayern Munich muhiim u ah kaas oo sanadkii 2019 ka tagay kuliyada kooxda ree London.
Kuliyada da’yarka Chelsea ayaa loo aqoonsan yahay mid kamida kuwa ugu wanaagsan Yurub waxaana ay sanadihii ugu dambeeyay soo saaraysay xiddigo badan oo kooxda koowaad soo galay.
Magacyada kasoo baxay halkaas ayaa laga xusi karaa Reece James, Mason Mount, Conor Gallagher, Tammy Abraham, Fikayo Tomori, Loftus-Cheek iyo Trevoh Chalobah.
