Qatar ayaa sameysay mid ka mid ah xafladihii furitaanka Koobka Adduunka ee ugu fiicnaa iyagoo soo bandhigay fantasiya aad u fiican oo ay u riyaaqeen dunida kubada cagta.
Waxa xaflada furitaanka ka qeyb qaatay oo daadihiye ka ahaa aktarka caanka ah ee Morgan Freeman kaasoo dunida u sharaxay qiimaha Koobka Adduunka iyo isdhexgalka bulshada iyo sida dadka Qatar ay u yihiin kuwa soo dhaweyn ku fiican.
Waxaa garoonka Al-Bayt Stadium oo loo ekeysiiyay teento badwiyiinta ah oo ku dhex taala saxaraha laga dhex sameeyay mahrajaano lagu soo bandhigay qariirada adduunka, calamada wadamada ka qeyb galaya Koobka Adduunka iyo weliba mascot-ka astaanta u ah Koobka Adduunka ee loo bixiyay Laciib.
Fanaanka ay dunida ka daba dhacday ee ka tirsan koox faneedka South Korea ee BTS Jung Kook ayaa hees soo dhaweyn ah ka qaaday Koobka Adduunka.
Waxaa Koobka Adduunka si rasmi ah u furay oo khudbad afka Carabiga ku jeediyay Amiirka Qatar Sheikh Tamim bin Hamad al-Thani, kaasoo dunida ku soo dhaweeyay dalkiisa islamarkaana iclaamiyay in Koobka Adduunka uu furan yahay.
