Afar dhamaadka Koobka Adduunka ee ay iskugu soo hadheen Argentina, Croatia, France iyo Morocco waxa uu iskugu keenay ciyaartooyo u dheela naadiyo kala duwan, laakiin badankooda waxa qaybsaday saddex koodoo oo daawashada kulamadani ay xiise gaar ah u yeelanayso, sababtoo ah waxay la soconayaan xaaladda ciyaartoydooda oo ay tahay inay dib ugu soo laabtaan marka uu tartanku dhamaado.
Kooxda ciyaartoyda ugu badan kaga jiraan afarta xul ee iskugu soo hadhay Koobka Adduunka ayaa noqotay Bayern Munich oo ay lix ciyaartoy kaga jiraan, waxaana tababare Julen Nagelsmann uu ku ducaysanayaa in ciyaartoydiisan aanay wax dhaawacyo ah soo gaadhin.
Horyaallada Yurub oo dib u bilaabmaya usbuuca ugu dambeeya bishan December, ayaa waxa Munich ay sii wadataa rikoodhkeeda cajiibka ah ee ah in ay ka mid tahay labada kooxood ee tan iyo 1980kii aanay ciyaartoydoodu ka maqnaanin finalka Koobka Adduunka.
Naadiga kale ee ku wehelinaya rikoodhkan ayaa ah Inter Milan, waxaana hadda ugu jira Lautaro Martinez iyo Brozovic oo ay qasab tahay in midkood uu finalka tegi doono. Sidaas oo kale waxa qasab ah in ciyaartooyo ka tirsan ay finalka tegi doonaan sababtoo ah xulalka Faransiiska iyo Morocco oo wada ciyaaraya ayay kaga jiraan ciyaartooyo.
Bayern Munich oo lix ciyaartoy kaga jiraan afarta xul ee semi-finalka Koobka Adduunka usoo gudbay, waxa soo raaca oo iyaguna ciyaartoyda ugu badan ku leh Atletico Madrid iyo Sevilla oo ay min shan ciyaartoy kaga jiraan.
Halkan kaga bogo saddexda kooxood ee ciyaartoyda ugu badan ku leh semi-finalka Koobka Adduunka:
Bayern Munich
- Kingsley Coman (France)
- Benjamin Pavard (France)
- Dayot Upamecano (France)
- Lucas Hernandez (France)
- Josip Stanisic (Croatia)
- Noussair Mazraoui (Morocco)
Atletico Madrid
- Angel Correa (Argentina)
- Nahuel Molina (Argentina)
- Rodrigo de Paul (Argentina)
- Antoine Griezmann (France)
- Ivo Grbic (Croatia)
Sevilla
- Bono (Morocco)
- Youssef En-Nesyri (Morocco)
- Gonzalo Montiel (Argentina)
- Marcos Acuna (Argentina)
- ‘Papu’ Gomez (Argentina)
